Йошкар-Ола уло Россий гыч балет артист ден хореограф–влакым чумыра. Рӱдӧ олаштына 20-шо гыч 26-шо апрель марте балет артист ден хореограф-влакын Россий кӱкшытан конкурсышт лиеш. Тудо Эрик Сапаев лӱмеш опера да балет театрыште эрта.
Программыште участник-влакын выступленийышт деч посна, выставке, лекций, мастар-класс, йыргешке ӱстел, усталык лабораторий да вашлиймаш- влакым эртараш палемдыме. Икымше туржо заочно эрта. Кокымшышко 50 наре еҥ эрта: 15 хореограф ден 30 куштызо. Финалыш 6 хореограф деч уто лекшаш огыл. Икымше кум премийым налше-влакым 300, 250, 200 тӱжем теҥге окса вуча.
Тиддеч посна нуно шке балет спектакльыштым Йошкар-Ола, Уфа да Воронежысе театрлаште шынден кертыт.
«Марий Эл» кугыжаныш телерадио компаний