Марий Элыште самырык-влак 105 тӱжем гана «Пушкин карте» дене пайдаланеныт

Эн шукыжо билетым театр ден филармонийыш налыныт

Ик ийыште республикысе самырык- влак шӱдӧ вич тӱжем гана «Пушкин карте» дене пайдаланеныт. 2022-шо ийыште «Пушкин карте» дене пашам ыштымым иктешлыме. Ӱдыр-рвезе-влак тиде программым 105 тӱжем гана кучылтыныт.

Эн шукыжо билетым театр ден филармонийыш налыныт. Мутлан, 2021-ше ийыште 32 тӱжем билетым налме ыле. Тӱвыра министерствын ончыктымыжо почеш, эн шуко Эрик Сапаев лӱмеш опера да балет театрыш, Шкетан лӱмеш калыкле марий драма театрыш, Яков Эшпай лӱмеш Марий Кугшыжаныш филармонийыш миеныт.

Идалык мучашлан «Пушкин карте» дене республикысе 72 тӱвыра тӧнеж пашам ышташ тӱҥалын. 2022 ийын 44 200 утла еҥын тиде картыже лийын. Тидыже целевой аудиторийын 70,7% процентше лиеш. 2021-ше ий дене таҥастарымаште программыш эше 18 тӱжем утла еҥ ушнен. Эн шуко картым Йошкар-Олаште, Звенигово да Медведево районлаште налыныт. Кодшо ийын эртарыме мероприятий-влак ныл пачаш ешаралтыныт: утларак концертым, кином ончыктымаш, вашлиймашым да выставкым эртарыме, палдара «Марий Эл» кугыжаныш телерадио компаний.

Кидшер
Шонымашым ешараш