Мер-политик рӱдерыште 18 мартыште Марий Мер Каҥашын 30 ийжылан пӧлеклалтше Марий форум лиеш. Тудо 9 шагатлан тӱҥалеш.
Лӱмгече пайремыш Пошкырт, Татарстан, Виче, Урал, Угарман, Моско, Одо, Шупашкар, Пермь кундемла да Марий Элын тӱрлӧ районлаж гыч марий меръеҥ-влак толыт.
Форумын кышкарыштыже «Мер илыш объектив гоч фотоончер» пашам ышташ тӱҥалеш, марий мер толкынын вияҥ толмыж нерген «Марий Эл» ГТРК-н фильмже ончыкталтеш, «Марий калык погын-влак(1992-2020)» книган презентацийже эрта, мер илыш нерген доклад-влак йоҥгат. Мер Каҥаш пеленысе Кугырак каҥаш шке погынымашыжым эртара. Форум пайрем концерт дене мучашлалтеш.