Марий Эл вуйлатыше Юрий Зайцев оперативный йодыш дене совещанийым эртарен. Тушто эн ончыч шуктышаш проектла да верысе тӱҥалтыш, тыгак вучыдымо ситуаций, пунчал да вашталтыш нерген калыклан увертарен шогышашлан кучем орган ден муниципалитет-влакын пашам пырля ыштымышт нерген каҥашыме.
Республикым вуйлатыше палемден: тудо социальный сетьлаште да моло ресурс гоч аклен возымым эреак лудын шога. Да шонымыж почеш, еҥ-влакын иктаж-могай ошкылым умылен шуктыдымышт увер ситыдыме дене кылдалтын, сандене чыла, поснак социальный, йодыш дене вашталтыш телевидений, электрон да печать йӧн дене але социальный сеть гоч рашемдалтшаш. Уке гын чыла тиде шоя да манеш-манеш дене амырталтеш. Кучем орган-влак кӱлешан уверым шылтышаш огытыл. Адакше республик ятыр шотышто сай ошкылым ыштен шуктен, тидым ончыктен гына моштыман, ешарен Юрий Зайцев.
Кучем орган ден тӱшка увер средстве-влак да регионым виктарыме рӱдер коклаште кыл кучымашым кузе пайдалынрак келыштараш кӱлмӧ нерген Марий Эл вуйлатышын администрацийжын увер паша пӧлкажын начальникше Наталья Домрачева, эл кӧргӧ полтике, верысе самоуправленийым вияҥдыме да юстиций министр Антон Мирбадалев каласкаленыт.
Марий Эл вуйлатыше мучашлан палемден: калыклан раш умылтарен шогымаш пӱсӧ йодышым пайдалынрак решатлаш полша, мер калыкын кучемлан ӱшанжым пеҥгыдемда.
«Марий Эл» газет