15 апрельыште 11 шагатлан С. Г. Чавайн лӱмеш калыкле книгагудын конференц-залыштыже мурызо Любовь Орлован «Кумыл сем» муро сборникшын презентацийже лиеш.
Любовь Орлова – Звенигово районысо Какшамар ялын шочшыжо. Изиж годсек мураш, кушташ аваже Матвеева Галина Вячеславовна ден туныктышыжо Александра Николаевна Копейкина кумылаҥденыт. Арам огыл икымше мурыжо «Йӧратыза те кызыт авадам» маналтеш. Любовь Орлован йоҥгалтарыме «Лиям мый суксо», «Молан йӧратенат?», «Шочынам мый Какшамарыште», «Кок йолгорно» да моло муро-влакымат марий калык йӧратен колыштеш. Кызыт тудын репертуарышытыже витле утла наре муро уло.
«Кумыл сем» муро сборникышке Любовь Васильевнан возымо муро-влакым пуртымо, тыгак В. Пектеевын, Р. Н. Николаеван (Мардан Рая), Л. Иксанован, А. Сенькован, И. Степанован, Н. Ильинан, А. Баязитован, Н. Янгелован, Г. Гаврилован, А. Полатован, Е. Логинован, Л. Очееван почеламутыштлан возымо муро-влакым чумырымо, нунылан семым автор шке келыштарен.