Марий Элым вуйлатыше Юрий Зайцевын кӱштымыж почеш республикын правительствыже «Марий Эл Республикыште поро кумыл (волонтёр) пашам вияҥдымашке надырым пыштымылан» отличий знакым ыштен.
Тиде знак поро кумылын шуктымо пашаште кугу заслугым ыштымым аклыме, тыгак Марий Эл Республик кумдыкышто поро кумыл пашам вияҥдымашке кугу надырым пышташ кумылаҥдыме формылан шотлалтеш.
Отличий знак дене Россий Федерацийын гражданже ден иностранный граждан-влак палемдалтын кертыт. Тыгодым тыгай условий шукталтшаш: нуно Марий Эл Республикыште поро кумыл пашам вич ий деч шагал огыл жап шуктышаш улыт.
Знак дене наградитлаш кӱлшӧ документ-влакым Марий Эл Республикын Молодёжный политике комитетше тений октябрьыште налаш тӱҥалеш.
Отличий знакым 5 декабрьыште Доброволец (волонтёр) кечым пайремлыме годым кучыкташ палемдыме.
Марий Эл Республикын правительствыже ««Марий Эл Республикыште поро кумыл (волонтёр) пашам вияҥдымашке надырым пыштымылан» отличий знак нерген» 165-ше№-ан пунчалым 2023 ий 13 апрельыште луктын.
«Марий Эл» газет