Автоклуб-влак негызеш 370 утла мероприятий эртаралтеш. «Тӱвыра» калыкле проект почеш налме шуко функциян тӱвыра рӱдер-влак тений 372 гана верлашке лекшаш улыт.
Автоклуб-влак шке пайдалыкыштым да кӱлешан улмыштым ик гана веле огыл пеҥгыдемден ончыктеныт. Кодшо ийын нуно 432 ялыште 146 тӱжем утла еҥым обслуживатленыт. Тений нунын эртарыме мероприятийлашке 30 тӱжем утла еҥ миен. Автоклубым тений У Торъял районышто кумданрак кучылташ шонат. Тушто яллаште 63 мероприятийым эртараш палемдыме. Кеҥеж мучко Сеҥымаш кечылан, Российын кечыжлан, Шарныме да ойганыме кечылан, Самырык- влакын кечыштлан тӱшка мероприятий-влак лийыт. тиддеч посна «Йӱд кино» акцийыш ушаш шонат. Шыжым ял озанлык предприятийлаш агитбригаде влак лектыт.
Кызыт 13 муниципал образованийыште автоклуб-влак пашам ыштат.
«Марий Эл» кугыжаныш телерадио компаний