Марий Эл тӱвыран сулло пашаеҥже, Олык Ипай лÿмеш сылнымут, тÿвыра да сымыктыш пашаште самырык-влаклан кугыжаныш премийын лауреатше, журналист, поэт, мер пашаеҥ Юрий Русановлан пӧлеклалтше «Юрий Русановлан 55 ий лиеш ыле…» шарныме кас 15 майыште Морко районысо тӱвыра пӧртыштӧ эрта.
Тушто поэтын почеламутшо, тудын мутшылан возымо муро-влак йоҥгаш тӱҥалыт. Касым М.Шкетан лӱмеш Марий драме театрын артистше да эстраде мурызо-влак сӧрастарат. Мероприятий 18 шагатат 30 минутлан тӱҥалеш.
Юрий Русановын лӱмжӧ марий тӱняште журналист, поэт, чолга мер пашаеҥ семын кумдан палыме. Тудын почеламут корнылашкыже айдемын кӧргӧ чон шижмашыже келгын возын; журналист семын саманын пӱсӧ йодышыжым лӱдде да тура нӧлталмыж дене пагалымашым сулен налын. Тыгак тудо мер пашаке чолган ушнен, лидер койышыжо шке йырже калыкым чумыраш, тиде але вес йодышым умылаш лийшын рашемдаш полшен.