Йошкар-Олаште капитально олмыктымо деч вара тӱрлӧ калык-влакын тӱвыра пӧртышт почылтеш. Тудым Марий Элым вуйлатыше Юрий Зайцевын решенийже почеш олмыктымо. Тиде пашалан виктер 29,3 миллион теҥгем ойырен.
Лишыл жапыште усталык коллектив-влак тӱрысынек уэмдыме пӧлемлаште ышташ тӱҥалыт. Зданийыште коридорым, звукозапись студийым, гардеробым ачалыме, омса-вакым вашталтыме, электромонтаж пашам шуктымо, кабинетлам тӧрлат. Лишыл жапыште видеоэскерыме системым, пожар да оролышо системым ыштат, пырдыж фасадым капитально олмыктат.
Регионым вуйлатыше палемден: республикысе чыла артистат, тӱҥалше-влакат марий кундемын ойыртемалтше тӱвыражам аралыше улыт.