Юрий Зайцев ден Рустам Миннеханов Татарстанысе Агрыз район Пелемеш селаште «Семык» марий тӱвыра пайремыш миеныт. Пайремыш Татарстанысе лу район, Свердловск область, Башкортостан, Удмуртий да Марий Эл гыч уна-влак миеныт.
Торжественный ужаш деч ончыч Марий Элым вуйлатыше дене Татарстанын Раисше Рустам Миннеханов чыла экспозиций ден кудо-влакым ончен савырненыт, марий йӱла дене, калык кидмастар- влакын пашашт дене палыме лийыныт, калыкле сийым тамлен онченыт.
Юрий Зайцев Рустам Миннехановлан ӱжмыжлан да шокшын вашлиймыжлан тауштен, уна-влакым пайрем дене салмален да палемден: Российыште пел миллион наре марий ила, а Татарстаныште — 15 тӱжем утла марий еҥ уло. Марий Эл гыч Татарстаныште марий йылмым туныктымо школ-влаклан марла книгам кондымо, — манын палемден. «Семык» кеҥежымсе пайрем радамым почеш. Тудо кугече деч вара шым арня гыч Тройчын арняште вӱргече гыч тӱҥалеш да Тройчын кечын мучашлалтеш.
«Марий Эл» кугыжаныш теле да радио компаний