Марий Элыште илыше пагалыме еҥ-влак!
Марий Эл Республикын Кугыжаныш Погынжын лӱмжӧ дене алал кумылын чыландамат Пеледыш пайрем дене саламлем!
Лач шӱдӧ ий ончыч, 1923 ийыште, Марий автономий областьыште пашаче калыкын революционный пайрем кечыж семын Йошкар пеледыш пайрем официально палемдалташ тӱҥалын.
Пеледыш пайрем марий калыкын пӱртӱс ылыжмылан да шошо агам мучашлымылан куанен пайремлымыжым веле огыл, тыгак моло калык дене пырля ваш келшен илен моштымыжым, кеч-могай пашаштат иктыш ушнен тыршаш кумылан улмыжым ончыкта.
Икымше Пеледыш пайремым эртарымылан курым жап эртен гынат, тудын ямже нимынярат йомын огыл, мӧҥгешла, у деч у йӱла дене пойдаралтын, эше ямлырак да сылнырак лийын. Тачысе кечылан тиде пайремым мемнан республикыште веле огыл, тыгак марий-влакын тӱшкан илыме моло кундемлаштат рӱж эртарат.
Калык тӱвырам, кугезе йӱлам, йымыжа марий йылмым арален кодымаште да вияҥдымаште, тыгак самырык тукымым шуарымаште Пеледыш пайремын кӱлешлыкшым да кугу надыржым ужын, 2022 ийыште Марий Эл Республикын Кугыжаныш Погынжын депутатше-влак регионым Вуйлатышын темлымыж почеш «О праздничных днях и памятных датах Республики Марий Эл» Закон дене тиде пайремлан официальный статусым пуэныт.
Марий калыкын ик эн йӧратыме пайремже тений 100-шӧ гана эртаралтеш. Садлан тудо поснак ойыртемалтше да ушеш кодшо лиеш, а тӱрлӧ кундем гыч толшо уна-влакым кугезе тукым деч куснен толшо йӱлаже, тӱвыраже да ямле сийже дене утыр куандара манын, порын ӱшаныме шуэш.
Марий кундемыште илыше кажне еҥлан волгыдо кумылым, пеҥгыде тазалыкым, илыш перкем да чыла тӱҥалме пашаште сай лектышым тыланем!
Виян лийже Марий Эл! Виян лийже куатле Россий!
Марий Эл Республикын Кугыжаныш Погынжын Председательже Анатолий Смирнов