Йошкар-Олаште кугу куат дене «Пеледыш пайремым» палемдыме. Рӱдӧ олашкына «Пеледыш пайремын» 100 ияш лӱмгечышкыже Российысе 14 регион гыч делегаций толын.
Олаште илыше- влакым да нунын унаштым Юрий Зайцев саламлен. Тудо палемден: «Пеледыш пайрем» 1920-шо ий годсек палемдалтеш, но Йошкар-Олаште тудо икымше гана 1923-шо ийыште лийын. Кодшо ий гыч пайрем Кугыжаныш пайремыш савырнен.
Погынышо-влакым тыгак Федераций совет председательын алмаштышыже, Марий Эл деч сенатор Константин Косачёв саламлен.
Агрыз районым вуйлатыше Азат Валеев Татарстан Республикын Раисше Рустам Миннеханов деч саламлымашым конден.
Торжественный ужашыште Марий Элым вуйлатыше тыгак награде-влакым кучыктен. «Россий Федераций ял озанлыкын сулло пашаеҥже» чап лӱмым «Семёновский» племзаводын Кугенерысе комплексшым виктарышын полышкалышыже Людмила Кузьминалан кучыктымо. Россий Президентын Чап грамотыжым «Оршанке сельхозпромын» тракторист-машинистше Юрий Игнатьев налын.
«Марий Эл ончылно надырлан» кокымшо степенян орденым тӱҥ марий карт Александр Таныгинлан пуымо.
Марий Эл Кугыжаныш Погын вуйлатышын алмаштышыжын полышкалышыже, писатель ушемын еҥже Александр Петров «Марий Элын калык писательже» лӱмым налын.
«Марий Эл ял озанлыкын сулло пашаеҥже» чап лӱм дене «Земледелец» ял озанлык артельын траскторист- машинистше Альберт Мамаев палемдалтын. Марий Эл Правительствын Чап Грамотыжым «Шойбулак» племзаводын тракторист- машинистше Рудик Григорьев налын.