«Лӱдыкшыдымо сай качестван корно» калыкле проектым илышыш пуртымо дене Российысе регион-влак коклаште Марий Эл – визымше верыште.
Пашам писын ыштымаш да шуко йыжыҥан тергымаш палемдыме мероприятийым качественно да графикым ончылтен шукташ полша. Тений Марий Элыште 35 % корным шотыш кондаш палемдалтын, а паша 40,7 % кугытыш шуэш. 2023 ийыште автомобиль корным да кӱварым чоҥаш, ачалаш, уэмден тӧрлаташ, шотышто кучаш 8,4 млрд. теҥге ойыралтеш.
Регион вуйлатыше Юрий Зайцев республикын корно отрасль предприятийлашкыже миен коштын. Тудо инертный материал ден асфальт-бетон смесьым тергыме лабораторийыште лийын, «Марийскавтодор» управленийын куснылшо лабораторийжым ончен савырнен.
Дорожный поселкышто республик вуйлатыше «Марийскавтодор» акционер ушемыште да «ДробТехМаш» предприятийыште лийын. Тыгак «Марий Эл Дорстрой» АО-н производствыжын куатшым аклен. Тиде предприятийын 10 асфальт-бетон заводшо уло. Нуно тӱрлӧ районышто верланеныт.
Юрий Зайцев «Мостремстрой» предприятийышкат миен. Ӱмаште тудо 593,4 пог.м кӱварым чоҥен да ачален. Пашан акше 720 млн. наре теҥгешке шуын. Тений чылаже 1 млрд. теҥгеаш тыгай пашам ышташ палемдалтеш. Республик вуйлатыше рашемден: «Лӱдыкшыдымӧ сай качестван корно» –регионлан моткочак кугу значениян, шуко оксам да вийым йодшо проект.
– Республикын правительствыже корно отрасльлан кугу тӱткышым ойыра. Таче мый производство-влакын куатыштым, мом ыштышашыштым кузе шуктымым шкеак ончен лекташ лийым. Корно пашаште шукыжым регионысо предприятий-влак ыштат. Ме шкеак заказчик, исполнитель да контролер улына. Тидым арален кодыман да вияҥдыман. Шукыштынак огыл тыгай кӱкшытан региональный предприятийышт уло, – каласен Юрий Зайцев.
«Марий Эл» газет