Звенигово районысо администрацийым вуйлатыше Сергей Петров дене паша вашлиймаш годым Марий Элым вуйлатыше Юрий Зайцев Красногорский посёлкысо Каныме да тӱвыра рӱдерым олмыкташ 20 миллион теҥгем ойырымо шотышто распоряженийыш кидпалыжым пыштен.
Сергей Петров объектым уэмдаш сметым ямдылыме шотышто увертарен да тауштен каласен, палдара «Марий Эл» газет.
Марий Элым вуйлатыше палемден: олмыктымо деч вара каныме рӱдер йӧнан веле огыл, тыгак еҥ-влакын илышыштлан лӱдыкшыдымӧ лийшаш. «Шарнем, ме туткар лийме кечын тышке толынна, онченна. Тудо татыште могай мерым ышташ лиеш – умылашат ок лий ыле. Тергымашын иктешлымашыжым да сметым шотыш налын, республик правительствын резерв фондшо гыч оксам ойырымо шотышто решенийым луктынам», – каласен Юрий Зайцев.
Вашлиймаш годым тыгак аварийный илыме вер фонд, Суслоҥгер посёлкыш вӱдым пуртымо системым уэмден олмыктымо, Звенигово олаште канализаций коллекторым чоҥымо да моло йодышым каҥашыме.