«Тӱвыра» калыкле проект почеш Йошкар-Олаште Рӱдӧ йоча книгагудым модернизироватлыме. Тыге капитально олмыктымо деч вара кокымшо модельный книгагудо почылтын. Тудым уэмдаш федерал бюджет гыч 5 миллион теҥгем, муниципал гыч 4 миллион утла теҥгем кучылтмо.
Олмыктымо пашам книгагудын чыла пӧлемыштыжат ыштыме. Пырдыж ден тувырашым шымартыме да чиялтыме, омса ден линолеумым вашталтыме. Муниципал окса дене санузелым, пурымо верым, книгам аралыме тӱҥ верым олмыктымо, электровоштырым вашталтыме, светильник-влакым вераҥдыме.
Книгагудыш Марий Элым вуйлатыше Юрий Зайцев миен да пашам кузе шуктымым ончен, персонал дене мутланен. Тудо лудшым вашлийме кумдыкым, вучымо йӧнан верым, модыш дене вияҥдыше верым, продлёнко группылан залым, компьютер классым, книгам аралыме, лудмо верым ончен.
Директорын мутшо почеш 8 ноутбукым, кок стационар компьютерым, интерактив панель ден телевизорым, интерактив ӱстелым, ВиАр шлемым, МФУ-м, акустике системым, ламинаторым, тӱрлӧ тӱсан принтерым, тӱжемат 112 книгам налме. Книгагудо тиде помещенийыш 1991-ше ийыште толын. Ынде тудо креатив да модный книгагудыш савырнен. Тиде мемнан кокымшо шочмо кечына, — каласен заведующий да Правительствылан, тӱвыра министерствылан кугу таум ойлен. Марий Элым вуйлатыше ынде лудшо-влакат ешаралтыт манын ӱшаным каласен.