Марий Элыште шордо-влакын коштмо пагытышт, пелашым кычалме жапышт тӱҥалын. Мужыр модмо жапыште янлык-влак автомобиль корнылашке чӱчкыдын лектыт.
Утларакше сентябрьын кокымшо пелыштыже коштыт. Сандене октябрь мучаш марте водитель-влаклан корнышто тӱткӧ лийман. Шордо дене ДТП чӱкыдын кастене, йӱдым але эр эрдене лиеда. Йӱдым тораш волгалтарыше тулым чӱктыман. «Ир янлык-влак» манын возымо пале тураште скоростьым иземдыман, чодыран корно тӱр марте кушмо верлаште тӱткышым пеш пӱсемдыман.
ДТП-ште шордо кола гын, 80 тӱжем теҥге штрафым тӱлаш верештеш. «Марий чодыра» паркын специалистше-влак шордым вашлийме годым чарнаш да эртен кайымыжым вучаш темлат. Нуным тӱкаш але сигналитлаш ок кӱл маныт. Молан манаш гын, коштмо жапыштышт нуно пеш осал лийыт.
Шордо воктекак логалында гын, эркын гына туп дене шеҥгекыла ошкылаш кӱлеш. Айдемын эркын кораҥмыжым тудо лӱдыкшын кайымыже семын умыла. Ажгыныше да поктышо шордо деч куржын утлаш ок лий, шижтарат эколог-влак.