Марий профессиональный театр искусство каваште эше ик шӱдыр йӧрен – лӱмлӧ марий режиссер, Марий АССР искусствын, РСФСР искусствын заслуженный деятельже Сергей Иванович Ивановын шӱмжӧ кырымым чарнен. Тудо 94 ийыш тошкалын ыле.
С.Иванов И.С.Палантай лӱмеш музыкально-театральный училищым, А.В.Луначарский лӱмеш ГИТИС-ын режиссер факультетшым тунемын пытарен. СССР-ын калык артистше Б.А.Завадскийын тунемшыжлан педагогшо эре тӱҥ пример лийын.
С.Иванов М.Шкетан лӱмеш Марий театрыште 1956 гыч 1974 ий марте ыштен, тышеч латкуд ийжым – театрын тӱҥ режиссержылан. Тиде театр коллективын репрессий пагыт да Кугу Отечественный сар деч вара йол ӱмбаке пеҥгыдын шогалме, вияҥме пагытше лийын. Тиде жап гыч театрлан артистым элысе рӱдӧ олалаште гына ямдылаш тӱҥалме. С.Иванов кугу верым драматург-влакым куштымо йодышлан ойырен. Тудын годым Сергей Николаев, Николай Арбан, Арсий Волков вийым налыт. Драматургийыш у лӱм-влак толыт, тиде — Константин Коршунов, Миклай Рыбаков, Василий Горохов, Петр Эсеней, И.Николаев. Сергей Чавайнын, М.Шкетанын да Ниикандр Лекайнын «Элнет», «Эреҥер» да «Кӱртнӧ вий» романышт почеш спектакль-влак сценыш лектыт. Репертуарым йот да совет драматургийысе эн сай произведений почеш шындыме спектакль-влак пойдарат.
Сергей Иванович шкежат пьесым воза. «Юл воктене», «Ольош» драмыже Шкетан лӱмеш театр, «Шергаш» драмыже Марий самырык театр сценылаште шындалтыныт.
Театр Всероссийский да Всесоюзный фестивальлаште вийжым терга, посна актер да С.Иванов шкежат тӱрлӧ кукшытан награде дене палемдалтыт.
Икымше марий «Акпатыр» оперым шындаш ямдылыме пашам виктарымаште да шындымаште(1963 ий) С.Ивановын надырже пеш кугу.
С.Ивановын тӱҥ режиссерлан ыштыме жапыште ик моткоч кугу паша ышталтын – Пошкырт, Урал да Свердловск кундемлаште илыше марий-влак деке кеҥежым гастрольыш кошташ тӱҥалме. Тидыже марий-влакым ик калык семын ушаш полшен. Тачат тиде йӱла ила.
Сергей Иванович шкежат артист семын сценыш лектын. Тыгак марлаш кусарыме художественный фильмлаште 150 рольым йӱкаҥден.
1982-1998 ийлаште С.Иванов И.С.Палантай лӱмеш музыкальный училищым вуйлатен. 1990 ийыште тушто актер отделенийым почмо деч вара Курыкмарий драматеатрлан ямдылыме актер-влак курсын художественный вуйлатышыже лийын.
Сергей Иванов марий профессиональный театр искусствышто келге кышам коден. Тудо мемнан ушышто да чонышто эреак уста, пеҥгыде койыш-шоктышан айдеме семын илаш тӱҥалеш.