Марий Эл Республикын Тӱвыра, савыктыш да калык-влакывн пашашт шотышто министерствыже спецопераций каен шогымо кумдыкыш Кечывалвел военный округысо подразделенийлан да республик гыч мобилизоватлалтше-влаклан техникым да оборудованийым колтен, возымо ведомствын сайтыштыже.
Марий Эл вуйлатыше Юрий Зайцевын темлымыж почеш театр учреждений-влак УАЗ («буханка») автомашина ден 4 раций комплектым ойыреныт.
Запорожье областьысе шефствыш налме Куйбышев районыш тыгак Лада Гранта автомобильым, библиотеке пашаеҥ-влаклан 22 тӱжем единице документацийым: лудшын билетшым (13,2 тӱжем штук), формулярлан вкладышым (8 тӱжем штук), тӱшка мероприятийлан паспортым (500 штук) – колтеныт.
Марий Эл правительстве председательын алмаштышыже – тӱвыра, печать да калык-влакын пашашт шотышто министр Константин Ивановын палемдымыж почеш, Марий Эл шефствыш налме муниципальный образований дене кылым кучен да мо кӱлешым каҥашенак шога.
– Марий Элын тӱвыра министерствыжын да ведомство организаций-влакын пашаеҥышт Запорожье областьысе икшыве-влаклан У ий вашеш шере пӧлекым ыштеныт. Тиддеч ончыч ме канцеляр сатум, автоклубым, мультимедий оборудованийым колтенна ыле. Кызыт ме вес ийланат ыштышаш пашам палемденна да ончыкыжымат шкенан военный да Куйбышев районышто илыше-влаклан гуманитар полышым обязательно ышташ тӱҥалына, – каласен Константин Иванов.
2024 ий январьыште гуманитар полыш семын книга ден семӱзгар-влакым, оргтехникым да тыгак военный кӱлешлыкан да быт ӱзгарым колтат.
«Марий Эл» газет