Марий Элыште тул ваштареш кучедалме ойыртемалтше режимым палемдыме

Марий Элын Виктерже республикын кумдыкыштыжо тул ваштареш кучедалме ойыртемалтше режимым палемдыме да чодырашке шонымо семын коштмым, транспорт дене пурымым шагалемдыме нерген пунчалым луктын. Ты пунчал дене келшышын, 22 апрель гыч 13 май йотке жаплан тул ваштареш виктаралтше ойыртемалтше режимым увертарыме.

Республикысе муниципальный образований-влакын администрацийыштым вуйлатыше-влаклан ола ден ял-влакым да нунын йырысе кундемым йӱлышӧ тӱрлӧ шўкшак, кукшо шудо да кошкышо пушеҥге, вондер деч жапыштыже эрыкташ, чодыра пожар деч, ял озанлык кўлешан мландыште кукшо шудо йўлаш тўҥалме деч тулын пӧрт ден оралтылашке куснен кертме йӧным пытараш, ял ден посёлкыла йыр минерализоватлыме полосам ышташ темлыме.

13 май йотке жапыште чодыраш шонымо семын кошташ да транспорт дене пураш чаралтеш. Тиде жапыште чодыраште Марий Эл Республикын Пӱртӱс ресурс, экологий да йырым йырысе средам аралыме министерствыжын пуымо разрешений негызеш гына пашам ышташ да пушеҥым шупшыкташ лиеш. Еҥ-влак разрешений деч посна республиканский значениян автомобиль корныла дене нигуш пурыде чодыра мучко кудалын эртен, тазалыкым пеҥгыдемдыме учрежденийлашке, здравницылашке, йоча лагерьлашке, каныме базылашке да турбазылашке, тушто каныше-влак деке, коллективный сад ден пакчалашке миен коштын кертыт.

Республикыште тул ваштареш кучедалме ойыртемалтше режимыш куснымо условийыште пожарный лӱдыкшыдымылык правил ден требованийым пудыртымо годым титакан еҥ ден юридический лица-влак дене мутым кучат.