Пагалыме марий калык!
Марий Мер Каҥаш лӱм дене алал кумылын Пеледыш пайрем, Семык, Агавайрем дене саламлем.
Пашаче калыкем, пӱртӱс дене келшен, ага пашам мучашлет. Ош марий тувырым чиен, куан кумыл дене ик эн йӧратыме, вучымо кеҥеж пайремышке ушнет. Тау, родем, умбакыжат поро марий кумыл дене иле.
Мыланна кажне марий ший падыраш гай шерге. Ялозанлыкыште тыршыше, икшывынам туныктымаште да шуарымаште чоным пуышо, тазалыкна верч эрже-касше тургыжланыше, сар куралым кучен, тыныс кавам аралыше, тӱвыра да мер пашаеҥ-влак – чыланат аклаш лийдыме поянлыкна улыда.
Тÿрлӧ кундемыште илыше марий-влакын иктеш погынымыштлан мемнан чонна гына огыл, пÿртÿснат куана, пайремым эртараш, шокшо кечын йолважым ик ганат ок чамане.
Лач пырляште иза-шольо, ака-шӱжар, тулар-тулаче семын келшен илымаш вияҥеш. Тек келшымаш тул калыкнан волгыдо илышыж верч эре йÿла.
Пайрем дене!
Марий Оньыжа Эдуард Александров