Россий науко академийлан 300 ий темме лӱмеш «Кызытсе финн-угроведений: науко – обществе – культур» финн-угровед-влакын Россий кӱкшытан VII шанче конференцийышт Йошкар-Олаште 27–30-шо июньышто эрта.
Конференций финн-угор йылмышанче, фольклористике, литературоведений, этнографий, музыковедений, этнический историй да моло гуманитар да мер шанче дене тÿрлö школ шымлызе-влакым иктыш чумыра. Тушто кызытсе финн-угроведений дене йодыш-влак каҥашалтыт, финн-угор калык-влакын йылмыштым, тӱвыраштым, йӱлаштым арален кодымо да вияҥдыме йӧн-влак ончалтыт.
1947-ше ий кыдалне кумдан палыме финн-угровед, СССР Науко академийын член-корреспондентше Д.В. Бубрихын темлымыж почеш икымше гана Совет ушем кӱкшытан финн-угор конференций лийын. Тиде йӱлам 1990-ше ийла кыдалне умбакыже шуеныт, Россий кӱкшытан конференцийым чумыреныт. Тыгай конференций финн-угор калык илыме кундемлаште вич ийлан ик гана эртаралтеш. 1994-ше ийыште Марий Элысе шымлызе-влакын ойышт почеш Йошкар-Олаште Россий кӱкшытан икымше шанче конференцийым эртарыме. Умбакыже тыгай конференций Мордовийыште(Саранск, 2000), Коми Республикыште (Сыктывкар, 2004), Ханты-Мансийскавтоном округ – Юграште (Ханты-Мансийск, 2009), Карелийыште(Петрозаводск, 2014), Удмуртийыште (Ижевск, 2019) лийын.
Шанче конференцийын пленарный ден секционный заседанийлаштыже шымлызе-влак финн-угор йылмышанче, литературоведений, фольклористике, этнографий, этнический историй да этносоциальный процесс дене кылдалтше кызытсе кÿлешан йодыш-влакым каҥашаш тÿҥалыт. «Финн-угор шымлымаш: эртыме корно да кызытсе жап», «Российысе финн-угор калык-влакын тӱвыраден йылмыштым шымлымаште да арален кодымаште кызытсе цифровой технологийым кучылтмаш», «Марий йылмызе-влакын шанче поянлыкышт: 2024-ше ийысе лӱмгече вашеш» теме-влак дене кум йыргешке ӱстелэртаралтеш.
Шымлыме паша лектыш посна сборник дене савыкталтеш да Российысе шанче паша-влакым цитироватлыме электрон базыш пурталтеш
Ты кугу погынымашышке шымлызе, туныктышо, тӱвыра, кугыжанышден мер пашаеҥ, журналист, аспирант да студент-влак ушнат.
Конференций Марий Эл Республикын Виктерже ден Марий Эл Республикын Тӱвыра, печать да калык-влакын пашашт шотышто министерствыже полшымо дене да Марий Эл Республикын «2013–2030-шо ийласе Марий Эл Республикын кугыжаныш национальный политикыже» кугыжаныш программыже почеш эртаралтеш.
Организатор-влак: Россий Федерацийысе финн-угровед комитет, Марий кундемысе финн-угровед комитет, В.М. Васильев лӱмеш Йылмым,сылнымутым да историйым шымлыше марий институт, Марий кугыжаныш университет.Конференций 27-ше июньышто М. Шкетан лӱмеш Марий калыкле драме театрыште 17.00 шагатлан почылтеш.
Икымше пленарный заседаний 28-ше июньышто М. Шкетан лӱмеш Марий калыкле драме театрыште эрта,10.00 шагатлан, кокымшо пленарный заседаний туштак 30-шо июньышто12.00 шагатлан тÿҥалеш.
Конференцийышке 284 йодмаш пурен. 200 шымлызе докладым очно ышта, 37 – заочно, 51 – онлайн.