Пужен ыштыме деч вара декабрьыште Марий Самырык театр ончышо- влаклан шке омсажым почеш. Тений Идалык мучаш марте театрын зданийжым йӧршын уэмдат. Пашан кузе кайымыже дене Марий Элым вуйлатыше Юрий Зайцев палыме лийын.
«Тӱвыра» калыкле проект почеш пужен ыштыме паша кодшо ийын кеҥежым тӱналын, тений идалык мучашлан тудым пытарышаш улыт. Пужен ыштыме годым1989-ше ийыште чоҥымо пӱтынь фасадым ик стиль дене ыштеныт, конструкцийлаште ситыдымашым кораҥденыт, леведышым ачаленыт. Пашам мучашлымеке театрын у спектакль- влакым шындаш у технологий йӧнжӧ лиеш. Артист- влаклан йӧнан гример пӧлем, репетиций да куштымо зал- влак лийыт, декорацийым, реквизитым, костюмым аралыме ешартыш вер лектеш.
Театрым пужен ышташ федерал бюджет гыч 461 миллион теҥгем, республикын казнаже гыч 197 миллион теҥгем ойырымо. Кызыт объект 66% ямде. Театрын тичмаш кумдыкшо кокытат 3 луаш нарылан кугемеш да 9 тужемат 300 квадрат метр лиеш. Ончымо залыш 200 наре еҥ пурен кертеш. Пужен ыштыме жаплан Марий Самырык театрым Шкетан лӱмеш театрыш кусарыме.
Шонымо почеш, артист- влак у театрыште ноябрь муаш гычак пашам ышташ туҥалыт. Ушештарена: Марий Самырык театрым 1991-ше ийыште ыштыме. Кызыт тудын репертуарыштыже марий да руш йылме дене 70 наре постановко уло. Кодшо ийын актёр-влакын пашаштым 52 тӱжем утла еҥ ончен.