Марий Эл Виктер председательын алмаштышыже — тӱвыра, печать да калык-влакын пашашт шотышто министр Константин Иванов Марий калыкын 12-шо погынжылан ямдылалтме да эртарен колтымо шотышто совещанийым эртарен.
Тӱҥ докладым Оньыжа Эдуард Александров ыштен. Тачысе кечылан республикыште да марий-вакын тӱшкан илыме кундемлаште делегат-влакым сайленыт, нунын анкетышт дене паша шукталтеш, секцийлаште ончышаш йодыш-влакым чумырат, тӱвыра программат ямдылалтеш.
Константин Иванов Погын дене кылдалтше лекше чыла йодышым жапыштыже решатлаш темлен, тудым сай кӱкшыт дене эртарышаш улына манын палемден.
Марий калык погын Йошкар-Олаште 31 октябрь гыч 2 ноябрь марте эрташ тӱҥалеш. Марий рӱдолашке 440 наре делегат толшаш.