Йошкар-Олаште кандашымше созыв Кугыжаныш Погынын икымше сессийже пашам ыштен. Повесткыш 19 йодышым пуртымо улмаш. Нунын коклаште Кугыжаныш Погыным вуйлатышым, алмаштышыже-шамычым, законодательный органыште тӱҥ паша семын ыштыше депутат- влакым палемдымаш, парламентын паша органжын составшым пеҥгыдемдышаш улыт ыле. Тиддеч посна ик депутатлан Россий Федерацийын сенаторжо — Кугыжаныш Погын деч представитель — полномочийым пуымо верч йӱклышаш улыт ыле.
Кандашымше созыв Кугыжаныш Погыным вуйлатышылан погынышо чыла 47 депутат Михаил Васютиным шогалташ йӱкшым пуэн. Тудын икымше алмаштышыже Лариса Яковлева лийын. .Александр Смирнов ден Александр Майоров Погыным вуйлатышын алмаштышыже улыт. Тыгак Погынын комитетлажым вуйлатыше- влакым да комитетлан еҥже-влакым сайлыме.
Эше ик кӱлешан решений семын Россий Федерацийын сенаторжо — Кугыжаныш погынын представительже полномочсийым Сергей Мартыновлан пуымым шотлыман.