Марий Элыште республикын 105 ияш лӱмгечыжлан пайремлаш ямдылалтыт. Мероприятий перечньыш 50 наре событий пура.
Тӱҥ вер чыла районыштат ямдылыме мероприятий- влаклан да пӱтынь марий йоча коллектив- влакын концертыштлан ойыралтеш: хорлан, калык семӱзгар оркестрлан, симфонический оркестрлан, «Волгенче» куштымаш ансамбльлан. Концерт Эрик Сапаев лӱмеш опера да балет Марий кугыжаныш академический театрын сценыштыже лиеш.
Пайремлымаш ондакак тӱҥалеш — 29-ше августышто Калык- влакын келшымаш пӧртыштышт. Тушто «Российысе калык- влак. Кугу еш- тӱшка историй» кугу выставке почылтеш. Ончерыште 100 утла ойыртемалтше артефакт ончыкталтеш- пӧръеҥ да ӱдырамаш вургем, живопись, графике, кид-паша сымыктыш ӱзгар- влак. Мероприятий программе тӱрлӧ форматым ушен шога: экологий акций гыч тӱналын Артекыште Марий Элын кечыже марте. Москошто «Россий» калыкле рӱдерын площадкыштыже республикым ыштымылан 105 ий темме лӱмеш «Теле йомак» выставке лиеш. Юрий Зайцев тиде ӱшанын кӱлешлыкшым палемден. «Россий» рӱдерыште Марий Эл шагал регион кокла гыч иктыже гына шкенжым ончыкта.
Пайрем датым Марий Эл дене пырля Запорожский областьысе Куйбышев районыштат палемдат. Тушко Марий Эл тӱвыра министерствын концерт бригадыже кая. Таче кечылан республикым ыштымалын 105 ий теммым ончыктышо логотипым ямдылыме. Юрий Зайцевын кӱштымыжӧ почеш шарнымашан медальын проектшым ямдылыме. Тудо 105 экземпляр дене лукталтеш. Каҥашыме почеш мероприятий планым пеҥгыдемдыме.