Кок пошкудо регионым пеҥгыде торгово-экономический кыл ушен шога.
«Экономике кылым вияҥдымаш поснак кӱлешан, экспорт каналым тӧремдыман. Регион-влак дене палдарыме пашам умбакыже шуйыман: кушто тиде але тудо проект илышыш шыҥдаралтеш, сай качестван продукций ямдылалтеш. Таче тӱҥ акцентым инноваций йӧнлан ыштыман. Палем: Чуваший кундемыште, Марий Элысе семынак, кӱкшӧ технологиян производство вияҥеш, технике лукталтеш. Южо сферыште ме тендан дене Юл кундемышт веле огыл, элыштат ончылно улына», – палемден Юрий Зайцев.
Олег Николаевын мутшо почеш, регион-влак икте-весыштым вияҥден кертыт, тидлан пырля тыршымат у йӧным пуа. Ик тыгай пырля шыҥдарыме проектлан (тудым Чуваш Республик шыҥдарен) Российын тӱрлымӧ картше шотлалтеш. Артобъектым Москваште «Россия» тӱнямбал выставке-форумышто ончыктымо.
Юрий Зайцев картлан пӧлеклалтше тоштерыште лийын. Марий Элыште тиде пашам Звенигово районысо кидмастар-влаклан шуктеныт.
Регион вуйлатыше-влак «Релематика» ООО предприятийыш миен коштыныт. Тыште электроэнергетике объект-влаклан продукцийым ямдылат. Тыгак Чебоксарыште шукерте огыл почылтшо «Пехет» агромаркетыште лийыныт. Тыште фермер-влакын ямдылыме продукцийыштымат ужалат.
Регион-влак кокласе кылым 2022 ий гыч Чуваш Республикын Министр-влак Кабинетше ден Марий Эл Правительстве коклаште ыштыме ойпидыш утларак пеҥгыдемдаш полша, палдара «Марий Эл» газет.