Россий кÿкшытан марий самырык тукым слёт И.С. Палантай лӱмеш тӱвыра да сымыктыш колледж пелен эрташ тӱҥалеш. Тений тудо 18 гана эртаралтеш, мероприятий Россий калык-влакын икоян улмо идалыклан пӧлеклалтеш. Тидын нерген организатор-влак увертарат.
Уна-влак радамыште Марий Эл, Пошкырт, Татарстан, Удмуртий, Киров, Угарман кундемла гыч марий самырык-влак лийыт. Ийгот — 16 гыч 35 ий марте. Студент-влак, самырык-влакын проектыштын вуйлатышышт да координаторжо-влак, усталык шӱлышан чолгаеҥ-влакым ӱжыт. Йодмаш-влакым mer-kanash@mail.ru электрон яшлыкышке 1 июль марте погат.
Слётын ик эн тÿҥ шонымашыже — марий самырык тукым коклаште ончыко вÿден кайыше еҥым кушташ, мер илышыш ушаш.
Слётым ямдылыме да эртарен колтымо организационный йодыш-влакым илышыш пуртымо верч Марий Эл Республикын тÿвыра, печать да калык-влакын пашашт шотышто министерстве, Самырык-влак политике комитет, «Мер Каҥаш», «Социал иницитив рӱдер», И.С. Палантай лӱмеш тӱвыра да сымыктыш колледж тыршат.