Марий калыкын йӧратыме да пагалыме мурызыжым, Татьяна Денисовам таче родо-тукымжо, йолташыже, коллегыже-влак шочмо кечыж дене саламлат. «Кидшер» интернет-журналын коллектившат, уло кумылын Татьяна Яковлевнам саламлаш вашка.
Татьяна Яковлевна, илышда сылне, поро лийже. Ӱмырда лийже пиалан. Ямле илыш-корным Юмо пуыжо эрла. Канде каван волгыдыжым, чевер кечын шокшыжым, леве йӱрын лыжгалыкшым, яндар южын ласкалыкшым, умыр касын тымыкшым тыланена. Ме тендам йӧратена да пагалена. У мурсаска-влакым вучена.
Татьяна Денисова Морко районысо Масканур ялыште шочын-кушкын. Весшӱргӧ ялысе кыдалаш школым тунем пытарен. Ачаже гармоньым шоктен моштышо, аваже мураш йӧратыше лийыныт. Таня изинекак мурашат, гармоньым шокташат тунем шуктен. Школысо самодеятельностьыш коштын, шуко гана пайрем концертлаште мурен. Школ деч вара Морко посёлкысо 24-ше номеран СПТУ-ш штукатур-малярлан тунемаш пурен. Туштат художественный самодеятельностьын активный участникше лийын. Училищыште «Рвезылык» ансамбль лийын. Тыште Татьяна эн тале солистке семын ойыртемалтын. Яндар йÿкшӧ ден чыла ончышо-влакым куандарен.
1985 ийыште Таня Йошкар-Олашке илаш толеш. Тыште «Марий памаш» ансамбльыш ÿдыр-рвезе-влакым погат манмым колын, тергымашыш мия. Ансамбльым вуйлатыше В.П. Данилов, сай йӱк дене сылнын мурымыжым колын, Татьянам тунамак коллективыш налеш. Ансамбльыште Татьяна солистка семынат, тӱшкан мурымаштат участвоватла.
«Марий памаш» дене пырля республике мучко да ӧрдыжкат коштеш. Чыла вере тудым яндар йӱкан мурызо семын палаш тӱҥалыт. Санденак «Яндар-яндар» калык мурым мурымыжым Марий радио дене йоҥгалтареныт. Тиде муро дене Татьяна Денисова уло республикылан у мурызо семын палыме лиеш. Тиддеч вара композитор Вениамин Захаровын «Вучыдымо вашлиймаш», «Изи кайык», «Ош йолгорно» мурыжо-влакым йоҥгалтара.
Тыге тудо 1993 ий гыч, «Марий памаш» деч ойырлен, моло композитор-влакын мурыштымат Йошкар-Олаште эртарыме пайрем концертлаште мурен коштеш. Репертуарже кугеммеке, пӱтынь концертым усталык касыште шкетынак ышта. Илен толын Марий филармонийын артисткыже лиеш. 1990 ийыште Смоленскыште эртыше «Голоса России» Всероссийский конкурс гыч дипломант лийын пӧртылеш. 1994 ийыште Словакийын Нитра оласе Тÿнямбал молодежь фестивальыште посна приз дене палемдалтеш. Фестивальыште Татьяна «Яндар-яндар» мурым йоҥгалтара. 2006 ийыште Татьяна Денисова Озаҥ оласе тӱвыра да сымыктыш университетым тунем пытарен.