Йошкар-Олаcе кундемлам шке жапыштыже да сайын эрыктыме шотышто арулык да порядке месячниклан тӱналтышым вӱдшор тылзын 1-ше кечынже пуымо.
Икымше тӱшка субботник 19-ше апрельыште лийшаш, а 26-шо апрельыште ола мучко кокымшо субботник эрта.
Палемдыман, ятыр виктарыше компаний тиде сомылыш шуматкечынак ушнен. Марий рӱдолан уремлашкыже шӱдӧ дворник лектын, рушарнян арулыкым ыштымаште шымле еҥ тыршен.