Мер каҥаш поро пашам ышташ ӱжеш!

Пургыж тылзын 27 кечынже Мер Каҥаш вуйверын черетан погынымашыже Килемар район Арде селаште эртен. Мер Каҥашын вуйверже Иван Григорьевичын ямдылыме шуэн вашлиялтше мут-влак мутерым савыкташ оксам погымо акцийым тарватен.
Тиде поро пашажым ыштыде огешат лий, вет тений ага тылзын 15-ше кечынже кумдан палыме марий шанчызе, филологий наука доктор, профессор Иван Григорьевич Ивановын шочмыжлан 80 ий темеш. Тудын лÿмжö Россий Федерацийын шанче да туныктымо пашаште кумдан палыме, финн-угор филологийыште ик эн почётан верым налын шоген. 
Профессор И.Г.Иванов ÿмыржö мучко марий йылмынам шымлен, пойдарен да арален шоген. Тудо шочмо йылмын кажне йыжыҥжым шымлен. Марий орфографийым саемдымаште кугу надыржым палемдыман: 1992 ийысе «Орфографический словарьын» шанче редакторжо лийын, тыгак 2003 ийыште вашталтше орфографий проектым ямдылымаште да редактироватлымаште тыршен. Марий йылмын лексике йодышлажым келгын шымлен, ятыр мутерым лукмаште тыршен. Студентше ден йылмызе-влакым шочмо марий йылмынан мутвундыжым у шомакла дене пойдараш ÿжын.
Иванов И. Г.Иван Григорьевичын савыктыме шанче паша лектышыже йылмынам умбакыжат шымлаш, самырык шанчыеҥ-влаклан шке пашаштышт у кÿкшытыш шуаш негызым пыштен.
Иван Григорьевичым ме чолга марий талешке семын палена. Тудо марий калык толкынын ончылъеҥже, Марий Мер Каҥашын активистше лийын. Тудын темлымыж почеш «Марий тиште кече» ий еда 10 декабрьыште Марий Эл Республикын кугыжаныш пайремже семын палемдалтеш.
Илыме курымыштыжо шымлызын 28 книгаже, 350 утла публикацийже савыкталтын. И.Г.Иванов ош тÿня дене чеверласен гынат, икмыняр оҥай да кÿлешан пашаже савыкталтде кодын. Нунын кокла гыч иктыже – «Мутвундынам пойдарена» («Словарь редких слов»).
Айста ме, пÿтынь марий калык, кажныже кертмына семын окса надырым пыштена да лÿмлö марий профессор Иванов Иван Григорьевичым порын да кугешнен шарныме шотеш тиде книгам лукмашке шке надырнам пыштена.
Оксам «Марий книга савыктыш» («Марий книга издательство») счётышкыжо колтыман. Тыгодым «И.Г.Ивановын «Мутвундынам пойдарена» («Словарь редких слов») книгажым савыкташ» манын палемдыман.
Оксам колташлан реквизит тыгай:

ГУП РМЭ «Марийское книжное издательство»
ИНН 1215054456
КПП 121501001
Отделение № 8614 Сбербанка России г. Йошкар-Ола
Р/с № 40602810537180100218
К/с № 30101810300000000630
БИК 048860630

Тыгак оксам «Марий книга савыктышын» кассышке намиен пуаш лиеш. Адресше тыгай: г. Йошкар-Ола, Панфилов урем, 39, 301 номеран кабинет тел.:8(8362)41-47-85, факс:8(8362)41-50-17

Мер Каҥашын Вуйверже.
Светлана Пехметован фотожо.

Кидшер
Шонымашым ешараш