Кажне ийын Марий калык конгресс идалыкым иктешла да сайлымаш конференцийым эртара. Тений тыгай погынымаш 26 январьыште Йошкар-Оласе Мер политик рӱдерыште эртен.
Калык конгрессын идалыкаш пашаж дене вуйлатыше Э.Александров да районласе пӧлкам вуйлатыше-влак: М.Егорова (Курыкмарий) ден Н.Зорина (Звенигово) палдареныт. Нунын лектышан пашаштлан Марий Элысе тӱвыра, печать да калык-влакын пашашт шотышто министр М. Васютин министерствын таумутшым кучыктен.
Ӱмасе погынымаште эн чолга марий-влакым премий дене палемдаш кӱлмö нерген кутырен келшеныт ыле. Тыге тений «Чолга марий» премийым Н.Зориналан, З.Александровалан да В.Кудрявцевлан кучыктеныт.
Икымше оналмаш В.Мочаев Х Марий калык погынлан ямдылалтме нерген каласкален. Кызыт районлаште делегат-влакым сайлат. Тусо погынымашлашке район пропискан гына йӱклаш толын кертыт. Кажне 2000 марийлан 1 делегат палемдалтеш, а кажне вич делегатлан ик эскерыше лиеш.
Конгрессым ятыр жап Республикысе йоча да самырык-влаклан театр-рӱдерын директоржо Э.Александров вуйлатен. Тиде конференцийыштат делегат-влак конгресс вуйлатыме сомылым (ынде кудымшо гана) тудланак ӱшаненыт. Председательын алмаштышыжлан Республикысе марий тӱвыра рӱдерын вуйлатышыже Н.Пушкинам коденыт.
Фотом Марий тӱвыра рӱдерын архивше гыч налме.