Пагалыме тунемше, туныктышо да ача-ава-влак! «Кидшер» этнокультурный сайтын коллективше тендам у тунемме да Шинчымаш кече дене алал кумылын саламла! Тачысе пайрем кажне еҥлан шерге. Вет ты кечын ме кеч-кунамат школ годсо йолташ да йӧратыме туныктышо-влакым шокшын да порын шарналтена.
Икымше гана парт коклашке шичше икшыве-влакым поснак шокшын-шокшын саламлена! Таче нине ӱдыр-рвезе-влаклан икымше гана школ йыҥгыр йоҥгалтеш. Лач тиде йыҥгыр, шинчымаш тӱняшке омсам почеш. Тек шинчымаш корныда волгыдо, оҥай, яндар да пиалан лиеш.
Теҥгечысе тунемше – студент-влакын илышыштышт таче у лаштык возалташ тӱҥалеш. Оҥай да тидын годымак палыдыме студент илыш тендам вуча.
Тиде пайрем кечын йӧратыме да пагалыме туныктышо-влакым саламлаш вашкена. Пагалыме туныктышына-влак, шке икшывыда семын тунемше-влакым чытен, умылен моштымылан, кӱкшӧ уш-акыллан да илыш корным палымылан – кугу таум ойлена. Лач тендан полшымо денем ме ончыко каена, кугу кӱкшытышкӧ шуына.
Пагалыме тунемше, студент, туныктышо да ача-ава-влак! У тунемме ийыште чыландаланат пеҥгыде тазалыкым, кӱкшӧ шинчымашым, усталык корнышто сеҥымашым, вашла пагалымашым, пиалым да чолгалыкым тыланен кодына! Алиса Ермакован почеламутшым тыланда пӧлеклена:
Кажне кечын тошкем школ йолгорным,
Шинчымаш памаш деке вашкем.
Кече, мыйым порын вашлийын,
Саламым колта эр эрден.
Йошкарген лекше кечым, моторым
Кажне чонанже ласкан вашлиеш.
Ал тӱсан кече йолжо эрдене
Шӱргемым ласкан шупшалеш.
Пуйто кидпӱянышке налын,
Школыш эрден ужата.
Кастен школ омса гыч лекмым
Уло шӱм-чон дене вуча.
«Кидшер» этнокультурный сайтын коллективше!