Наталья Венина: «Марий ден англичан йылмым тунемза!»

Наталья Венина Марий кугыжаныш университетын калыкле тӱвыра да тӱвыра кокласе коммуникаций институтыштыжо (ИНКиМК) марий да англичан йылме туныктышо лияш ямдылалтеш. Кызыт 5-ше курсышто шинчымашым пога. Тудо тыгак Кугыжаныш управленийын изи академийын (МАГУ) выпускникше улеш. Ӱдыр изинек шке шочмо йылмым сайын палаш кӱлеш манме шонымаш дене кушкын. Англичан йылмын кызытсе саманыште кугу верым налмыжлан кӧра тудым келгынрак тунемаш кумылаҥын. Тачысе кечылан Наташа йылме-влаклан кугу верым ойыра. 
Марий ӱдыр тӱрлӧ мероприятийыште, модмаште уш-акылжым терга, шагал огыл организацийыште чолгалыкым ончыкта, сӱретлашат моткоч йӧрата.
— Университетыш тунемаш пурымек, чолгалыкетым эн ончычак кушто ончыкташ тӱҥалынат?
— Икымше курс гычак «ВийАр» организацийыш ушненам, тӱрлӧ марий акцийлаште участвоватленам. Мутлан, «Мый марла ойлем» акцийыште. Тудын тӱҥ шонымашыже — шочмо йылмым, тӱвырам арален да вияҥден шогымаш. Тыгак университетыште тунемме жапыште шуко мероприятийыште лийынам, уда огыл портфолиом погенам. Кажне ийын «Что? Где? Когда?» интеллектуальный модышышто уш-акылемым тергем. А 2013 ийыште Ижевскыште «По следам вместе» регион-влак кокласе лагерьыште лийынам. Тунамудмурт йылме пеш келшен шинчын. «Узы-Боры» кином онченам, да Алексей Шкляев кином марлашке кусараш темлен. Тыге удмурт кином марлашке кусаренам. Текстын руш вариантшым пуэныт. Тыгодымак удмурт йылмым эркын-эркын тунемаш тӱҥальым. Тений шошым Краснооктябрьский школышто марий йылмым туныкташ пиал логале. Тылеч посна МАГУ-што шинчымашым погенам. Тушто такшым посна специальностьым огыт пу, Марий Элыште могай кучем органын кузе да могай пашам ыштыме дене палымым ыштат, практике-влакым эртарат: министерствылаште (мый ведомствышто — тӱвыра рӱдерыште — эртенам) да ГФИ-н (Марий Эл Республикысе тӱҥ федерал инспекторжо) аппаратыштыже. Тунемме ий мучаште соцпроектым араленна.
Ӱмаште Марий тӱвыра рӱдерыш пашаш пуренам. Тушто сайтым виктаренам: марла да рушла уверым савыктенам, афишым, аудиозаписьым возенам, мурын мутшым луктеденам, у книга-влак дене палдаренам, «Вконтакте» соцсетьыште тӱшкам шочыктенам. А телым «Язык для тебя» шке проектем шочыктышым.
— А шке проектым ышташ шонымашет кузе шочын?
— Такшым тыгай шонымаш ушышкем ик ий ончычак пурен ыле. Проектын цельже — марий да англичан йылмым тунемаш шонышо-влаклан мӧҥгӧ гыч лекде йылмым тунеммаш йӧным ышташ. Молан йот йылме-влакым онлайн скайп гоч тунемаш лиеш, а марий йылмым уке? А вет тудым тунемаш шонышо шагал огыл. Тыгай шонымаш дене пашам тӱҥалме. Февраль тылзе марте технический заданийым ямдылыме – сайтыште мо, могай раздел лийшашым возымо. Март мучаште сайт шочын. Тушто, заявкым коден, англичан да марий йылмым тунемаш лиеш. Тыге, кажне кумылан айдеме мӧҥгыж гычак скайп программе полшымо дене мый денем марий да англичан йылмым тунем кертеш. Проектым шаркалаш манын, «Вконтакте» ден «Фейсбук» соцсетьлаште тӱшкам почмо. Кызытсе жаплан мый денем марий йылмым кок еҥ тунемеш. Иктыже Моско ола гыч (ила Америкыште), а весыже — Санкт-Петербургышто немыч йылмым туныктышо.
— Сӱретлашат моткоч йӧратет. А чонетлан мо лишыл?
— Эн чот портретым карандаш ден сӱретлаш йӧратем, тыгак гуашь денат чиялташ логалын. «Студвесна» ден «Голос юности» конкурс-влаклан командем дене шойылым (задникым) сӱретленна. «МарГУ-шко тунемаш пуро» конкурсышкат сӱретым колтенам ыле.
— Ончыкылык шонымашетше могай?
— Эн тӱҥ шонымашем — ончыкыла шуаралташ. Тышкак проект пура да тудын дене кылдалтше паша. А ончыкылык шонымаш-влак тӱрлӧ улыт, но — нуно тӱвырген шуын огытыл, садлан ойлашыжат нимолан. Эн тӱҥжӧ — шуаралтмаш.

Татьяна Аптыкова

Кидшер
Шонымашым ешараш