Марий Элым «Пушкинский картым» илышыш шыҥдарыме шотышто эн сай регион-влак коклаште палемдыме. Сеҥыше-влаклан наградым Российысе кугыжаныш академий самырык-влак театрыште пайрем церемонийыште кучыктеныт.
Келшен толшо категорийыште кӱкшӧ лектышым ончыктымыштлан Тамбов, Сахалин, Кострома, Пенза, Курск, Тула да Саратов область-влакым палемдыме. Марий Эл дене пырля сеҥышыш Чуваший Республик ден Мордовий Республикат логалыныт.
Тылеч посна, «Пушкинский картым» илышыш чолган шыҥдарымылан Приволжский федерал округым (тудын радамышкыже Марий Эл пура) суапландареныт.
«Пушкинский карте» — тиде кугыжаныш программе, тудо 14 гыч 22 ияш марте самырык-влаклан федерал бюджет кӱшеш театрыш, тоштерыш, филармонийыш да моло тӱвыра тӧнежыш яра кошташ йӧным пуа.