Марий Эл Республикын сулло журналистше Вячеслав Кольцовын ӱмыржӧ лугыч лийын. Тудлан 67 ий лийын. Тидын нерген «Кидшер» интернет-журналлан Российысе журналист-влак ушемын республикысе пӧлкаштыже увертареныт.
Вячеслав Кольцов 1958 ий 9 ноябрьыште Марий АССР Морко районысо Ӱлыл ялыште шочын. 1982 ийыште Марий кугыжаныш университетын историй-филологий факультетшым тунем пытарен. Профессионал пашажым Марий радиошто тӱҥалын, тушто редактор гыч радиовещаний службым вуйлатыше марте кушкын. 2005 гыч 2024 ий марте «Марий Эл» ГТРК-н радиовещаний службым вуйлатен.
Тудлан кумдан палыме лияш «Шым гана висе» мыскара программе полшен, тидлан кӧра тудын йӱкшым республик деч ӧрдыжтат сайын паленыт. 2009 ийыште тудлан «Марий Эл Республикын сулло журналистше» чаплӱмым пуымо. Тудо тыгак Российын сулло радистше лийын да Российысе журналист-влак ушемын Марий региональный пӧлкажын составышкыже пурен.
Пашаеҥже-влак тудын марий калыкле журналистикым вияҥдымашке кугу надыржым да пашалан ӱшанле улмыжым палемдат.