Марий Эл Республикын Кугыжаныш Погыныштыжо депутат-влак «Марий Эл Республикын Кугыжаныш гимнже нерген» тӧртыкым пеҥгыдемденыт. Тидын нерген парламентын пресс-службыжо увертара.
Палемдыме: кызыт марте гимн нерген положений тӧртык дене огыл, а 1992 ийыште Марий ССР Кӱшыл Советын пунчалже дене пеҥгыдемдалтын улмаш. Пеҥгыдемдыме тӧртык дене гимнын текстшым марий (олыкмарий, курыкмарий) да руш йылме дене, тыгак сем савыртышым да официальнын кучылташ кӱлмӧ радамым палемдыме.
Гимным Марий Эл вуйлатышылан присягым пуымо деч вара должностьыш шогалме годым, Кугыжаныш Погынын да муниципал образований-власын представительный органжын заседанийыштым почмо годым лӱҥгалташ (мураш) кӱлмым пеҥгыдемдыме. Гимным самырык-влакын форумыштым почмо годым, кугыжаныш да муниципал пайрем-влаклан пӧлеклалтше, самырык политике тӧнеж-влакын пайрем мероприятийлаштышт, тыгак спорт таҥасымаш-влакын официальне церемонийыштышт — нуным эртарыме правил почеш — мураш лийме йӧным палемдыме.
Тылеч посна, тӧртыкым пудыртымо але гимн деке раш койшо шотдымылыкым ончыктышо семын кучылтмо годым мут кучаш шогалтыме радамым пеҥгыдемдыме.
Тидде посна, Марий Элын тистыжым официальне физкультур мероприятий да спорт таҥасымаш годым шогалташ темлыме.