VI Марий самырыктукым слётыш ушныза!

Кок тӱжем латнылымше ийыште Марий самырыктукымын Россий кӱкшытан VI слётышт Марий кундемын Параньга район Олор кыдалаш школ пелен эрташ тӱҥалеш. Ончылгоч палемдыме жап: 29 июнь – 6 июль. Слётыш ушнаш манын, йӱла почеш эссем возыман. Тиде ийын – «Вуйлатыше лиям гын…».
Ты гана тӱрыс слёт «Самырыктукым да верысе кучем» теме дене кылдалтеш. Тиде ийын Российын ятыр регионыштыжо, тыгак Марий Элыштат тӱрлӧ кӱкшытан сайлымаш-влак лийыт. А Марий самырыктукым слётын ик эн тӱҥ шонымашыже: марий ӱдыр-рвезе-влак коклаште ончылъеҥым – депутатым, вуйлатышым – кушташ. Слётыш толшо-влак сайлымаш кампаний, депутат паша нерген шуко пален налыт да шкештат тидын гоч кызытеш модын эртат. Кодшо ийын слётышто самырык правительстве радамым кучылтмо ыле. Тӱрлӧ министерстве лийын, министр ден депутат-влакым сайлыме. Тыге ӱдыр-рвезе-шамыч шке ӱмбакышт шукырак сомылым налыныт да утларак пеҥгыде да пашашаче койышым ончыктеныт. Чылажымат шотыш налын, организатор-влак теният ты структурылан эҥерташ шонат.
«Марий самырыктукымын Россий кӱкшытан VI слётшо» проектым «Интеллектуал» тӱвыра-увер рӱдер возен. Тудлан икмыняр шийвундым «Марий Элын 2013-2020 ийлан кугыжаныш национальный политикыже» республикысе программе гоч Тӱвыра, печать да калык-влак паша шотышто министерстве ойыра. Слётын организаторже-влак: Марий Элысе тӱвыра, печать да калык-влак паша шотышто министерстве, Туныктыш да шанче министерстве, Мер Каҥаш, «Интеллектуал» тӱвыра-увер рӱдер, Марий калык конгресс, «ВийАр» мер ушем.
Тенданат Марий самырыктукым слётыш ушнаш кумылда уло гын, «Вуйлатыше лиям гын…» эссем marislet@mail.ru электрон почтыш колтыза. Лекше йодышым 8-917-703-66-24 номеран телефон дене рашемден кертыда.
Мут олмашеш: I слёт Морко район Октябрьский школ пелен эртен, II слёт — Советский район Ӱшнӱр школышто, III — Курыкмарийыште, IV — Торьял район Токтарсолаште, а VI гана самырык-влак Юлсер кундем Сотнур школышто погыненыт.
Палемдена: Слётыш Российын тӱрлӧ регионжо гыч 18-30 марий ӱдыр-рвезе-влак ушнен кертыт. Корно роскотым колтышо-влак, а илыме да кочкыш шотышто роскотым вашлийше-влак кучат.
Слётышто лияш 700 теҥге оргнадырым (оргвзнос) пыштыман, тыгак анкетым да фотом колтыман.

Анкетым налаш

Марий самырыктукым слётын организаторжо-влак

Кидшер
Шонымашым ешараш