Пеледыш пайрем: мурымаш, куштымаш да калык кочкыш

Йошкар-Олаште регион-влак кокласе Пеледыш пайрем 16 июньышто эрта.

Пайрем Йошкар-Оласе Тумер отышто Агавайрем дене 9 шагатлан почылтеш. Тиде жапыштак Тӱҥ каныме паркыште кудо-влакым вераҥдат. 9 шагат гутлаштак Тӱҥ каныме паркыште Марий Элысе сӱретче ден фотограф-влакын пленэрышт почылтеш.

10 шагатлан Ленин лÿмеш тÿвыра полат ончылно Йошкар-Оласе да республикысе районла гыч уста коллектив-влак, мер ушем ден калыкле-тӱвыра автономийын еҥышт погынат. 11 шагатлан тӱвыра полат гыч Ленин проспект дене В.И. Ленин лӱмеш площадь марте таҥ ошкылыт. 11 шагатат 45 минутышто Пеледыш пайрем торжественно почылтеш.

12 шагат эрталтымеке пайрем колонно Комсомольский урем дене Тӱҥ каныме паркыш кая. Тыште кечыгут, 18 шагат марте, мурымаш-куштымашан, йоча да спорт мероприятий-влак лийыт, тыгак черемис кучедалмаш, марий калык модмаш-влак эртат.

Кеҥеж эстраде площадкыште пайремым «Морко кундем» калык вокал ансамбль тӱҥалеш. Тыштак 16 шагатат пелылан гармончо-влакын фестивальышт эрта. Тушко гармончо-влак дене деч посна марий калык семӱзгар дене шоктышо мастар ден такмакче-влакым пагален вучат.

12 шагат эрталтымеке «Калык чон» фольклор мероприятийыш районла да регионла гыч толшо коллектив-влак ушнат, посна мурызо-влакат мурчоныштым почыт. Тыштак 16 шагатат 30 минутлан Марий Эл Республикысе йоча да самырык-влаклан театр марий драматург Зинаида Долгован «Немыч вате» спектакльжым ончыкта.

Сеҥымашын 30-шо идалыкше лӱмеш полат ончылно «Пеледыш-miks» икмыняр мероприятийым уша: пеледыш нерген мурым мурышо-влак коклаште конкурс эртаралтеш, пеледышым аршашыш чумырымо шумлык мастаргудо почылтеш. «Марий ӱдыр» моторлык да усталык конкурс лиеш, тыгак этномодын кызытсе тапырысе виктышыже дене палдарат. Морко кундемысе «Шуматкече» вокал да семӱзгар ансамбльын, эстон хорын выступленийыштым ончаш лиеш.

11 шагатлан Чарла Кремльыште «Пеледыш fest» тӱвыра, туризм да каныме фестиваль тӱҥалеш. Тыштак сылнымут уна алан почылтеш. Эстон шагат годым Эстонийысе Тарту ола гыч камерный хор ден куштышо коллектив шке мастарлыкыштым ончыктат. Марий сем почеш этнофитнес эртаралтеш.

Пеледыш пайрем Ленин площадьыште мучашлалтеш. Тушто 18 шагат гыч 22 шагат марте кум мероприятийым ужаш лиеш. Я. Эшпай лӱмеш Марий кугыжаныш филармоний «Марипарк» сем да куштымаш спектакльым ончыкта. Тудын деч вара пайрем концерт лиеш. Тудым марий эстрадын шÿдыржö-влак сöрастарат. Пеледыш пайрем «Йӱд ола» файер-шоу мучашла.

Кидшер
Шонымашым ешараш