Марий йылмым, тӱвырам, йӱлам йӧраташ да аралаш, ончыкылык тукымнам тидлан эреак туныктен шогышаш улына. Мутлан, йоча-влаклан марий шӱлышан мероприятий-влакым эртарен шогаш — сай паша.
Йошкар-Оласе Калыкле президент школ-интернатыште «Самырык тукым» республикысе йоча усталык конкурсым эртен. Конкурс Марий Эл Республикын 95 ияш лӱмгечыжлан пӧлеклалтын.
Тышке Йошкар-Оласе 14 №-ан гимназий, Калыкле президент школ-интернат да районла гыч лу школ ушненыт.
Йоча-влакын мастарлыкыштым жюри ончен лекмек иктешлымашым ыштен, икымше верышке У Торъял районысо Тошто Торъял кыдалаш школын тунемшыже-влак «Мераҥын шочмо кечыже» йомак дене сеҥыше радамышке лектыныт. Кокымшо верыш «Юзо вӱд» йомак дене Шернур районысо Лажъял кыдалаш школын тунемшыже-влак налыныт. Кумшо верым «Выдхоза дон Ши Пӱан Ший Пампалче» йомак дене Килемар район Арде кыдалаш школын тунемшыже-влак палемдалтыныт.
«Самырык тукым» конкурсым Республикысе марий тӱвыра рӱдер, Марий Элысе тӱвыра, печать да калык-влакын пашашт шотышто министерстве, Марий Элысе туныктымаш да шанче министерстве эртареныт.
Автор: Дмитрий Никифоров;
Лидия Семёнован фотожо.