Кечышот. 24 октябрь (шыжа)

Мо дене тиде кече шарнымашеш кодын? Могай лӱмлӧ еҥ шочмо кечыжым палемда? Тидын нерген «Кидшер» интернет-журналын материалыштыже.

Пайрем да шарнымаш кече-влак

  •  Россий — Спецназ подразделений-влак кече.

Событий

  • 1897 ий — Российыште икымше футбол матч эртен.
  • 1935 ий — Кремль башньын вуйыштыжо Йошкар шӱдырым вераҥдыме.
  • 1939 ий — нейлон чулка-влакым ужалымашке луктыныт.

Шочыныт

  • 1955 ий — Василий Алексеевич Янцев, Марий Элысе ял озанлыкын сулло пашаеҥже. Ойырен налме профессийже дене шинчымашым Марий кугыжаныш университетын ял озанлык факультетыштыже поген. Паша корныжо Мичурин лӱмеш колхозышто тӱҥалын. 1980-ше ий гыч «Великополье» ял озанлык ушемын вуйлатышыже лийын. Кундемысе погынын депутатше сомылымат шуктен.
  • 1945 ий — Татьяна Владимировна Попова, Марий Элын сулло шанче пашаеҥже. Шочмо верже – Морко. Паша корныжо Марий кугыжаныш университет дене кылдалтын. Тӱҥ шотышто тудо химийым келгынрак шымлен: химий кафедра вуйлатышат лийын. Химий шанче кандидат.
  • 1954 ий — Аркадий Витальевич Яндулов, администраций да мер пашаеҥ. Тудо Мари-Турек кундемысе Мари-Возармаш ялыште шочын-кушкын. Паша корныжо кундемысе администраций дене кылдалтын. Ынде ятыр ий Аркадий Витальевич вуйлатыше сомылым шукта. Мер пашаштат моткоч кугу пагалымашым сулен: 8-ше марий погынын делегатше лийын.

Калык пале

Филиппын кечыже. Тиде кечын корно чот лаввыран лиеш, маныныт. Но туге гынат, вакшыш пырчым йоҥышташ наҥгаеныт. Ты кечын вочшо лум йӱштö теле толмо нерген шижтара.

Кидшер
Шонымашым ешараш