Мо дене тиде кече шарнымашеш кодын? Могай лӱмлӧ еҥ шочмо кечыжым палемда? Тидын нерген «Кидшер» интернет-журналын материалыштыже.
Пайрем да шарнымаш кече-влак
- Россий — Таможньо пашаште тыршыше-влакын кечышт палемдалтеш.
Событий
- 1922 ий — Россий элыште граждан сар мучашлалтын.
- 1971 ий — Тайвань элым ООН-ын составше гыч лукмо.
- 1990 ий — «Юзо пасу» («Поле чудес») телепередаче икымше гана эфирыш лектын.
Шочыныт
- 1906 ий — Яныш Ялкайн, марий серызе, почеламутчо, кусарыше, этнолог, фольклорист, СССР Серызе-влак ушемын йыжъеҥже (1934).
- 1921 ий — Василий Филиппович Филиппов, шанче пашаеҥ да литератор. Юлсер кундем Корамас ялеш шочын. Шинчымашым Козьмодемьянск педучилищыште налын. Вара Марий кугыжаныш педагогик институтышто, аспирантурышто шинчымашым келгемден. Кугу Ачамланде сар тул коклаште лияш логалын. Нелын сусыргымылан кӧра шочмо кундемышкыже пӧртылын да кундемысе газет редакцийыште пашам ышташ тӱҥалын. Паша корныжо туныктымаш сомыл денат кылдалтын, вет Василий Филиппович Морко кундемысе да Йошкар-Оласе тӱрлӧ школ-влакын вуйлатышыже лийын. А 1963-шо ий гыч Марий политехник университетышке вончен. Ятыр шанче пашан авторжо. Сылнымут аланыштат кугу чапым сулен: «Шоҥго ӱдырын мурыжо» пьесыжым театрын сценыштыжат шынденыт. Философий шанче кадидат.
- 1935 ий — Леонид Павлович Николаев, Россий Федерацийын да Марий Элын сулло туныктышыжо. Шкеже Морко кундем Курыкӱмбал ял гыч. Шинчымашым Морко педучилищыште налын. Вара Крупская лӱмеш Марий кугыжаныш педагогик институтышто шуаралтын. Паша корныжо Морко кыдалаш школышто тӱҥалын. Физика дене туныктышо семын тыршен да вуйлатыше марте кушкын. Кундемысе туныктыш пӧлкаштат суапле пашам вӱден. Леонид Павлович Марий Элыште икымше туныктымо-производственный комбинатым чумырен. Пашам тыршен ыштымыжлан кугыжаныш чап танык денат палемдалтын.
- 1948 ий — Татьяна Никандровна Кузнецова, туныктыш пашаеҥ, Россий Федерацийын сулло туныктышыжо, Марий Элын сулло туныктыш пашаеҥже. Курыкмарий кундем Рутка ялеш шочын. Тудо гын Оршанка педучилищыште шуаралтын. 1969-ше ий гыч Козьмодемьянск олаште 1-ше номеран кыдалаш школышто пионервожатыйлан, школ паша деч ӧрдыжсӧ сомылым шуктымо шотышто организаторлан тыршен. 1980-ше ийыште гимназийын вуйлатышыже лийын.
- 1942 ий — Геннадий Владимирович Тымбаев, кугыжаныш да партий пашаеҥ. Шочмо велже – Кужэҥер. Ончычсо паша корныжо Медведево кундемысе комитет дене кылдалтын, вара Параньгасе комитетыштат тыршен. 1984-ше ий гыч Морко райисполкомын вуйлатышыже, икымше секретарьже лийын. 2 ий Марий Элысе калык дене пашам ыштымаште министрын алмаштышыжлан тыршен.
- 1951 ий — Геннадий Михайлович Танаев, Марий Эл Республикысе ялозанлыкын сулло пашаеҥже. Шернур кундем Марисола ял – тудын шочмо верже. Шинчымашым Озаҥ оласе ялозанлык институтышто поген. Килемар кундемыште исполком вуйлатышыжлан, икымше секретарьжылан тыршен. 1991-97-ше ийлаште ял озанлык министрын алмаштышыже лийын. Вара «Марагроснаб» ушемыш куснен.
Калык пале
Ондронник кече. Ожно ты кечын каваште шӱдырым эскереныт. Кава яндар гын, шӱдырын чолгыжмыжым онченыт: шӱдыр шуко гын, вес ий пурса сайын шочеш. Камвочшо шӱдыр кугу мардеж толмо нерген шижтара.