Тений Кино идалыкыште Россий кинематографийын кечыжым (27 август) кумдан эртараш палемдыме. Идалыкаш программе дене келшышын «Кино йӱд» лӱман акцийым увертарыме. Тудым Россий Федерацийын Тӱвыра министерствыже да Кино фонд эртарат.
Мероприятийыш ушнышо кажне кумылан еҥ режиссер Николай Лебедевын «Легенда №17» художественный кинолентыжым, Дмитрий Месхиевын «Батальонъ» сар нерген драмыжым да «Смешарики. Легенда о золотом драконе» анимаций фильмым ончен кертеш. Чыла кином яра ончыктат.
Марий Элысе Тÿвыра министерствын пресс-службыжын палемдымыже почеш, республикыштына кинокас-влак икмыняр вере эрташ тӱҥалыт: Кужэҥер, Оршанке, Параньга, Мари-Турек да Шернур поселкылаште, Волжский районысо Памарыште да Курыкмарий районысо Виловат селаште. Йошкар-Олаште фильм-влакым «Чарла Кремль» тÿвыра да историй комплексыште ончыктат. Йоча, ача-ава-влаклан оҥай каныме программым ямдылыме. Тудо 18.00 шагатлан тӱҥалеш. Кинокас – 20.00 шагатлан.
