Кеҥежым — кечан Болгарийыште

Кеҥеж жапыште йотэлыште теҥыз воктене канаш – кугу пиал. Тений мыламат Болгарийыште, Шем теҥыз воктене, лияш логале. Тидлан моткоч куаненам ыле, вет вес кундемыш лекташ чӱчкыдын ок верешт. Тушко мый паша дене (йоча-влакым лагерьыш канаш наҥгаенам) миенам гынат, канашат жап лийын.
Болгарий Европын кечывалвел ужашыштыже верланен. Тудын ик могыржым Шем теҥыз мушкеш. Болгарий Румыний, Сербий ден Македоний, Греций да Турций дене пошкудо улеш. Россий гыч Болгарийыш кум шагат жапыште самолёт дене миен шуаш лиеш. 
«Мистрал 2» лагерьын пашаеҥже-влак мемнам порын вашлийыч. Тыште илаш вер ситыдымылан кӧра мемнан группым унагудышто вераҥдышт. Шоналтышым: путёвко-влакым пеш вашке наледен пытарат, вет тиде лагерьышкат логалаш куштылго огыл. Молан манаш гын тышке Россий ден Болгарий гыч веле огыл йоча-влак толыт, тыгак Украина, Литва, Польша да моло пошкудо эл гычат шукын улыт.
Икымше кечылаште лагерьын паша радамже да Шнуй Влас ола дене палыме лийна. Тыште 4000 наре еҥ ила. Ондак утларакшым кок-кум пачашан пӧрт-влакым веле нӧлтеныт гын, турист-влак ешаралтмылан кӧра кызыт шуко пачашан полат-влак шукемыт. Оласе уремлаште алыча шуко. Йырымваш тӱрлӧ тӱсан роза пеледеш. Верысе калык тыгак виноградым кушта. Уремыште шуко рушым ужаш лиеш. Тыгак поляк-влак ятырын улыт.
«Мистрал 2» лагерь тиде олаште верланен. Курорт олаште улмо чыла вере шижалтеш: кажне ошкылышто отель, кевыт да ресторан-влак. Уремыште тӱрлӧ туристым вашлияш лиеш. Верысе калык рушла умыла, славян группыш пурымыжлан кӧра болгар йылмат руш деч чот ок ойыртемалт, сандене икте-весе дене мутланаш неле лийын огыл. Южгунамже англичан йылмым палымемат полшен.
Лагерьын распорядкыже нерген кӱчыкын каласаш гын, кандаш шагат эрталтен – кочкыш, варажым кечывал кочкыш марте — теҥызыште йӱштылмӧ да серыште каныме пагыт. Кечывал кочкыш, каныме шагат, адак кочкыш, яра жап, куд шагат деч вара – кас кочкыш, кандашат пелылан кас мероприятий тӱҥалеш. Тудын деч вара дискотеке да латик шагат кастене – малаш вочмо жап. Икманаш, канаш чыла йӧн уло. Унагудышто лиймылан кӧра ме лагерь илышым шуэн гына ужынна. Кас мероприятий-влакым ончаш мияш тыршенна. Эше икмыняр ойыртем нерген каласыме шуэш. Тиде лагерьыште лужавуй-влак уке улыт. Нунын олмеш йоча-шамычым ужатен толшо-влак пашам ыштат. Мероприятийым аниматор эртара. Мемнан вел лагерьлаште конкурс-влакым шуко кучылтыт гын, тыште «Визитке» манме гына кугу рольым модеш, молыжлан кажне визитке деч вара иктаж куштымо-мурымо номер-влакым колтат да канен ситарыше группо-влакын вуйлатышыштым палемдат.
У верышке толат гын, тудым эн ончыч шымлаш тыршет, экскурсийлашке коштат. Мемнамат тыгай кумыл авалтен. Эн ондак ме Несебр олашке шке семын миенна. Тушко каяш нимогай нелылык уке. Остановкышто визытан але кандашан автобусышко шинчыч, да пел шагат гыч тый тушто лият. Экскурсийым налаш шергыш шуэш.
Несебр ола (курык коклаште) 850 метр кумдыкан да 300 метр кужытан полуостровышто верланен. Несебрым кок ужашлан пайлыме: У Несебрыште тачысе кечылан келшыше пӧрт да отель-влак шогат, туштак «Солнечный берег» лӱман курорт комплекс верланен, да Тошто Несебр, кушко ме миенна. Несебр Европышто ик эн тошто олалан шотлалтеш. Тушто лу тӱжем еҥ ила. Таче Тошто Несебрыште шуко шаланыше верым ужаш лиеш: крепостной пырдыжын, башньын, капкан ужашышт да рельеф. 1983 ийыште тиде олам ЮНЕСКО тӱнямбал наследийын спискышкыже пуртен. Шуко раскопкым ыштымылан кӧра Несебр олан историйжым тӱрыс шымлаш лиеш.
Ондак Болгарийын территорийыштыже фракиец-влак иленыт. Тидын нерген Несебр олаште мумо керамике палдара. Шымлызе-шамыч тудым мемнан эра деч ончычсо латикымше-латкокымше курымла дене кылдат. Икманаш, ончыч тиде верыште Менебрия лӱман илем (послений) лийын. Мемнан эра деч ончычсо кудымшо курым мучаште дорийский грек калык тудым греческий колонийыш да сатулымо рӱдерыш савырен. Тиддеч вара олам Месамбрий але Месембрий маныныт. Вара тудо Рим империй кид йымаке логалеш. Тунам шкенжын оксажым лукташ тӱҥалеш. Рим империй шаланыме деч вара тиде ола Балкан полуостровге Византийыш пура. 811 ийыште болгар хан Крум Грозный Месембрий олам шке кид йымакыже налеш да Несебър (Несебыр, Несебр)манын лӱмда. 1452 ийыште Несебр ола Осман империйын озаланымыж годым пытымашке шуэш. Турко-влак тышке шке религийыштым да тӱвыраштым конденыт. Тиде жап гыч тошто фонтан да турецкий монча аралалт кодыныт. 1920 ий гыч Несебр ола курорт семын тӱзланаш тӱҥалын. Тачысе кечылан полуостров ден материкым ушышо ужашыште, олашке пурымо верыштак, ожнысо крепостной пырдыжын, черкын да башньын шаланыше ужашыштым ончалаш лиеш.

Автор: Татьяна Япаева

Кидшер
Шонымашым ешараш