Кугу Сеҥымашын 78 ияш лӱмгечыжлан пӧлеклалтше парад Йошкар-Олаште эртен. Тудын дене Киевско-Житомирской ракетный дивизийын командирже, полковник Олег Тетеркин командоватлен.
Парадыште 1,7 тӱжем еҥ участвоватлен, 20 наре технике ола урем мучко кудал эртен. Нунын коклаште «Ярс» ракетный комплексын автономный пусковой установкыжо, «Листва» дистанционно разминироватлыше бронироватлыме машина, диверсий ваштареш кучылталтше «Тайфун» боевой машина да молат.
Парад плацконцерт дене мучашлалтын. Тудым военный оркестрын шоктымыж почеш контракт почеш служитлыше-влак ончыктеныт. Програмышт Кремльысе полкын почет караулжын показательный выступленийже гыч лийын, сандене ончаш моткоч оҥай ыле.