Вокалист, актёр да продюсер, Марий Эл Республикын калык артистше Вильсур Хамеевын ӱмыржӧ лугыч лийын. Тидын нерген Я. Эшпай лӱмеш Марий кугыжаныш филармоний увертарен.
Хамеев 1950 ий 30 июльышто Иваново областьысе Шуяште шочын. И. С. Палантай лӱмеш тӱвыра сымыктыш училищын вокал пӧлкажым тунем пытарен. 1972 ий гыч Кугыжаныш музык театрыште — кызыт Э. Сапаев лӱмеш Марий кугыжаныш опера да балет театрыште — актёр-солист-вокалист семын пашам ыштен. 1983–1988 ийлаште Удмуртийын Кугыжаныш музык театржын солист-вокалистше лийын. 10 ий наре Марий опера да балет театрын директоржын алмаштышыже должностьым айлен, 1998 ий гыч Я. Эшпай лӱмеш Марий кугыжаныш филармонийын директоржын алмаштышыже лийын.
1993 ийыште Хамеев «Какшан» группым, 1995 ийыште — «Полярная звезда» группым, а варарак «Ди-Ди» да «МариStar» коллектив-влакым чумырен. Хамеевын почмо студий у семӱзгар коллектив ден мурызо-влаклан корным почын.