«Йыргешке пӱкен»: Мыланна уло, мо нерген ойлаш!

Тиде кечылаште калыкна Тиште кечым палемда. Кундемыштына ты пайремлан ятыр мероприятийым эртараш палемдыме.
Теве таче, 8 декабрьыште, «ВийАр» тӱвыра да келшымаш кыл ушем Талантан йоча-влаклан калыкле президент школ-интернатыште тунемше-шамычлан «Йыргешке пӱкен» клубым чумырен. Тиде гана уна семын вашлиймашыш Марий Эл писатель ушем правленийын председательже, «Кече» журналын тӱҥ редакторжо, сылнымутчо Светлана Дмитриевна Архипова толын. 
Светлана Дмитриевна шке усталык корныжо да йоча-влаклан пӧлеклалтше сылнымут произведенийже, Марий Эл писатель ушемын пашаже нерген палдарен. Шукерте огыл самырык сылнымутчо-влаклан эртыше «Сылнымут шыже -2015» семинар-совещаний нерген ойлен, «Кече» журналын пытартыш номерже дене палымым ыштен, а вара тунемше да уна-влакын йодышыштлан вашештен.
Тыгай вашлиймашын пайдажым жап ончыкта. Шинчаваш мутланымаш кажне еҥын чоныштыжо вет могай гынат кышам кода. Кӧ пала, ала «Йыргешке пӱкенышке» толшо кокла гыч, илен-толын у мутмастар лектеш.
Тыгак «ВийАр» ушемын еҥже-влакат йоча-влаклан тыланымашым ойленыт.

Кидшер
Шонымашым ешараш