2015 ий – Сылнымут идалык. Кузе тудо мучашлалтеш?
27 ноябрьыште самырык возгалыше-влаклан «Сылнымут шыже – 2015» йӱлаш пурышо семинар-совещаний Йошкар-Олаште эртен. Тиде гана семинар Сылнымут идалыклан пӧлеклалтын ыле. Россий писатель-влакын ушемышт лӱмеш Марий Элысе оргкомитетын пӧлкашкыже поэзий да прозо жанр дене 100 утла олыкмарий, курыкмарий да руш йылме дене возымо рукопись пурен.
Усталык союз пӧртын конференц-залыштыже 50 утла еҥ «Сылнымут шыже» семинарым торжественно почмаште лийыныт. Чаманен каласыман, чыла автор-влак кокла гыч южышт толын кертын огытыл, но туге гынат нунын денат ончыкыжым палыме лияш йӧн газет да журналла да тыгак «Эрвий» альманах гоч лиеш.
Семинар ныл секций дене пашам ыштен. 1 секций – марий прозо. Вуйлатыше сомылым Юрий Соловьев, Мария Илибаева, Людмила Ягодарова, Аркадий Богданов,Елена Юнусова, Надежда Федосеева шуктеныт. 2 секций – марий поэзий. Анатолий Тимиркаев, Валентина Изилянова, Лидия Иксанова, Мардан Рая да Альберт Васильев самырык сылнымутчо-влакын пашаштым лончылен, каҥашым пуэныт. Руш прозо 3 секцийым Сергей Шелепов, Павел Шулепов вуйлатеныт, а руш поэзийыште 4 секцийыште Геннадий Смирнов, Александр Коковихин, Елена Хисамутдинова самырык поэт-влак дене пашам ыштеныт.
Вуйлатыше-влак самырык автор-влакын тӱрлӧ жанрыште да тӱрлӧ тематике дене возымым палемденыт. Самырык возгалыше-влакын пашаштым кугурак пагалыме поэт да писатель-влак акленыт, тыгак нуно шкештат рукопись материал-влак шотышто каҥашеныт да икте-весыштлан сай каҥашым пуэныт.
Эн самырык участник-влак тений Йошкар-Оласе 7 школ гыч 2-3 классыште тунемше ӱдыр-влак лийыныт. Поснак Екатерина Мимееван шке кид дене ыштыме блокнот-книгаже шукыштым ӧрыктарен. Тудо тӱрлӧ жанрыште воза. Йомакым, почеламутым оҥай йоча йылме дене воза, а ойлымашыже-влак кӱчык да келге шонымашан улыт. Нуным лишыл жапыште «Кече» журналыште лудаш йӧн лиеш. Илен-толын ала тиде лӱмым мемнан кундемыште веле огыл, а Россий кӱкшытыштат палаш тӱҥалыт, манын ӱшаныме шуэш.
Тыгай семинар кок ийлан ик гана эртаралтеш. Теат почеламутым, ойлымашым возеда гын, «Сылнымут шыже» семинар-совещанийыш ушнен кертыда.
Снимкыште: Марий Эл писатель ушем пӧлкам вуйлатыше Светлана Дмитриевна Архипова Шернур школ гыч марий йылмым туныктышо Софья Альбертовна Рослякова дене «Сылнымут шыже – 2015» годым.
