Кугу Отечественный сарыште сеҥымылан 70 ий темеш. Уло элна тиде пайремым пайремлаш ямдылалтеш. «Кидшер» интернет-журнал сар темылан пӧлеклалтше «Ме шарнена» интернет-проектым тендан дене пырля эртарынеже. Сар нерген шке шонымашдам але сарыште лийше, фронтлан полшышо еҥ-влак нерген материалдам info@kidsher.ru электрон почтышкына вучена.
«Ме шарнена» интернет-проектна Волжский районысо Памашэҥер ялыште илыше уста туныктышо, шуко шочшан ава, йӧратыме да йӧратыше кова, Анастасия Павловна Иванова дене тӱҥалына.
Анастасия Павловна 1925 ий 19 январьыште шочын, ынде 90 ий наре илыме жапыштыже чылажымат ужын: порыжымат, осалжымат.
Илыме курымжо куштылгыжак лийын огыл. Поснак неле-йӧсӧ сар пагыт эртен. Но кеч-мо гынат, ачаж-аваже тудым туныктышак тыршеныт. Морко педучилищыште кӱлеш шинчымашым налын, кугурак изаже-влак семынак самырык ӱдыр туныктышылан пашам ышташ тӱҥалын. Сотнур кундемысе икмыняр школышто тыршен пашам ыштен, 38 ий йоча-влаклан тӱҥалтыш шинчымашым пуэн. Пелашыже, Кугу Отечественный сарын ветеранже Илья Иванович дене куд шочшым ончен-куштеныт, йол ӱмбак шогалтеныт. Таче тудо латик уныкан да кандаш кугезе уныкан поро кова улеш.
Шукерте огыл, Сеҥымашлан 70 ий теме вашеш Анастасия Павловналан шарнымаш медальым кучыктеныт. Меат Анастасия Павловнам, вашлиймашна годым, Сеҥымаш кече дене, уло кумылын саламлышна.
Автор: Николай Любимов,
«Кидшер» интернет-журналын тӱҥ редакторжо