Марина Яндыбайын блогшоИнтернетыште марий сайт, блог-влакым чӱчкыдынрак да чӱчкыдынрак ужын кертына. Ынде мыняр ий предприятий-влак, марий газет ден журнал, мер организаций-влак шке сайтыштем тӱрыснек марла вӱдат але марий вариантым темлат. Икмыняр тылзе ончыч интернетыште марий сайт-влак нерген возенна ыле. Кызытат марий сайт ден блог-влакым шергал лекна. Палемдыме шуэш, тачысе кечылан интернетыште витле утла марий шӱлышан сайт уло. Икмыняр тылзе ончыч оҥай MariBlog.ru у сайт шочын, тудын авторжо самырык да чолга марий рвезе Евгений Декин лудаш темла. Арня ончыч «Кидшер» сайтын редакцийже деч Марина Чермакова марий блогым ышташ полышым йодын. Ме уло кумылын Мариналан марий блогым ыштен улына. Тудым yandybay.wordpress.com адрес дене лудын да ончен кертыда. Кызытсе жаплан блогышто тӱрлӧ кӧргӧ паша-влак эртат. Авторын ойлымыжо почеш, блогышто марий сылнымутлан, поснак марий почеламутлан кугу вер ойыралташ тӱҥалеш. Каласен кертына, интернетыште марий блог, сайт-влак шукем толыт.
Марий йылме интернетыште вияҥеш манына гынат, но интернетыште марла мутланыше шагалак вашлиялтеш. Чолга марий еҥ-влак, марий мурызо, актёр, журналист ятыр гана серышым рушла возат, но вет нунак мемнам марий мероприятийышке кошташ кумылаҥден шогат. Тыгай сӱретым ужмек марий калык, марий интеллигенций верч намыс чучеш.
Возымо шотыштат каласен кодыман. Сайт-влак тӱрлӧ улыт, нуно тӱрлӧ стиль дене возкален шогат, но возымо годым йоҥылышым шукынжо ыштат. Предложенийым йоҥылыш чоҥат, пунктуаций да орфографий йоҥылышат вашлиялтеш. Тидыже лудшылан ӧпкелалташ амалым луктеш.
Туге гынат, ме марий калыкым йӧратен, пагален илышаш улына. Марий калыкын йылмыжым, тӱвыражым, йӱлажым, тудын эртыме корныжым шарнаш кӱлеш. Ме марий калык вожылшаш огына ул. Марла мутланаш, йочанам марий йылмылан туныкташ, марий блогым, сайтым вӱдаш, марий йылме нерген вес калыклан каласкалаш, вожылде мый марий улам маншаш улына.
Блогым ышташ тенданат кумылда уло гын, info@kidsher.ru электрон почтышко возыза!

Автор: Николай Любимов

ВАШМУТЫМ КОДАШ

Please enter your comment!
Please enter your name here

Лимит времени истёк. Пожалуйста, перезагрузите CAPTCHA.