«Марий улмем дене кугешнем» фотоконкурсым иктешлена

0
42
гана онченыт

«Кидшер» этнокультурный сайт, «Язык для тебя» тунемаш темлыше сайт да марий йылме дене увер-влакым лудаш темлыше «Увер йолва» сайт «Марий улмем ден кугешнем» фотоконкурсым увертареныт ыле. Тиде уверыште конкурсын иктешлымашыжым ончалын кертыда. Эн тӱҥалтышыште конкурсышто кок номинаций увертаралтын ыле, но йодмаш-влакым ончымо почеш номинаций-влакым ушен улына. Каласен кодыман конкурсышто чылажге 12 участник таҥасен, а пашаже 30 утла лийын. Жюрин пашаже пеш шуко жап шуйнен, но туге гына ик ойышко лекна. Тыгеракын, конкурышто кок сеҥыше-влакын лӱмышт дене палдарена, да нуным сеҥымаш дене саламлена!
Икымше, Шернур районысо Лажъял кыдалаш школын 6-шо классыште тунемше Волков Николай да тудын вуйлатышыже Волкова Надежда Геннадьевна «Марий улмем дене кугешнем» заметке дене сеҥыше радамышке лекте. Тудын пашаже:
Кажне еҥын шке шочмо-кушмо верже уло. Тиде вер дене тудо кугешна, шке вий-куатше дене чапландара. Илымыж годым сай кышам кодаш тырша.

Мый Марий элын эн сылне лукыштыжо шочынам, Курык марий районысо Озёрка ялыште. Тиде вер-шӧр вӱд, кол,чодыра да емыжлан поян. Садлан кажне кеҥеж кечын ачам,авам да изам дене модо погаш, а шыжым пӧчыж да поҥго погаш коштынна. А ачамже могай  гына кугу кол-влакым кучен куанен? Шотленат от пытаре:нужгол, косаргол,мокшынчо, ловал, шийгол, шыла, шемгол, тото.
Айдеме ӧрдыж велыште умыржо мучко илен огеш керт. Жап эртымеке, шум-чонжо шке шочмо-кушмо верышкыже шупшаш тӱҥалеш. Садлан ачам ден авам  еш пыжашым Шернур район Лажъял ялын эн сылне пӱртӱс лоҥгаштыже , Лаж эҥер воктене, чоҥеныт . Тыштак изи шӱжарем Виолетта шочын.
Ялыште еҥ-влак  ик еш семын, ваш-ваш полшен илат. Пайрем кечынат пырля каналтат, пашамат  ружге шогалын ыштат. Кеч пиал але ойго лиеш гын, ваш пайлат. Мый  Лажъял калыкем  дене кугешнем.
Марий калык шке лӱмлӧ еҥже дене кугешна. Тиде поэт С. Г. Чавайн, С. Вишневский, писатель-влак Ш. Осып, М. Шкетан. Лажъял кундемат лӱмлӧ  еҥлан поян. Тиде М. Шкетан  лӱмеш марий театрыште тыршыше артист Бирюков Александр, тале спортсмен-влак  Валерий Горохов ден Ираида Малинина, уста мурызо  Александр Беляев да тулеч молат.
Мый Лажъял тун школышто шинчымашым погем. Эн ончыч рушла гына мутланенам гын,кызыт марла ойлем. Мыйым уста туныктышо-влак туныктат: Людмила Анатольевна Волкова, Маргарита Арсентьевна Емелькина, Светлана Ивановна Лопкина, Валентина Витальевна Волкова.
Класс вуйлатышына Надежда Геннадьевна Волкова. Тудо урок деч вара марла мураш, кушташ туныкта. Школышто марий йӱлам пагалаш туныктат. Шорыкйол касым, Ӱярня пайремым, Марий тиште кечым палемдена. Марий талешке кечылан пӧлеклалтше концертыште шке марий койышнам ончыктена.
Садлан мый марий улмем ден кугешнем: марла ойлем, марла  мурем да куштем. Кугу лиймеке, шке марий калыклан пайдам кондаш тӱҥалам. Шке вий-куатем дене Марий элым, Марий калыкем чапландараш тӱҥалам!

Волков Николай, 6 класс Лажъял школ

А вес сеҥышына Озаҥ ола гыч - Софья Шарабуева. Сеҥыше-влакым уло кумылын саламлена! Пӧлекым мемнан деч налын кертыда. Тидлан мемнан дене вашкылым ыштыза. А кӧ сеҥыше радамышке логалын огыл гын, ида ӧпкелалт, кажныже «Кидшер» этнокультурный сайт деч таумутым налеш.

«Кидшер» интернет-журналын коллективше

Текстыште йоҥылышым муында гын, пожалуйста, йоҥылышым палемден Ctrl+Enter темдалза.

ВАШМУТЫМ КОДЫЗА

Please enter your comment!
Please enter your name here

Лимит времени истёк. Пожалуйста, перезагрузите CAPTCHA.